Киб къваригIаниги къуват батулев
ГIузрабазул цIураб Дагъистаналда
Дарулъун вижана АхIмад-хIажияв.
Жагьиллъи халкъалъул лъугIизабизе
ЛъикIав имам щвана, щукру Бичасе.
Иман-исламалъул рукнаби малъун,
Муридзабазул хIал хIадур гьабулев.
Муфтияталъул ракI, рухIияб къуват
Къвин гьечIеб беролеб бацIцIадаб рахIмат.
Берцинаб тIабигIат, магIнаяб калам,
РекIелъе бортулеб вагIза-насихIат.
Кумек хIажаталъун хIадурго щолев,
Киб къваригIаниги къуват батулев.
Исламалъул вацал цоцалъ гъункизе
Кидаго ккун бугеб гIурччинаб байрахъ.
ЦIуне, Аллагь, Дуца Дагъистанилан
Даимго гьабулеб гьари Бичасде.
Исламалъул нухда бакараб чирахъ,
Мисаллъун вуго мун гIолеб гIелалъе.
ГIакълуги сабурги ва гIадатлъиги, -
ГIелаз-гIелазухъе кьеги ирсалъе.
Нилъер умумузул исламияб цIар,
БацIцIадго цIунана Дагъистаналда.
Дур хIаракаталда къватIиб биччараб,
«Ас-салам» гIеларищ, гIалам кантIизе.
Магьди имамасе салам кьезегIан
Кьейги Бичас дуе дагьалги сонал.
Исламалъул нухда нур базабизе
Гьарула дуй сахлъи, АхIмад-хIажияв.
