Берал чвахун гьабила шукру
Рохалил хабарал гIемер рагIаги,
Шукрудул данделъи гьарзаго ккаги.
Рохалилаб гуреб кагъат щогеги,
Даимго рахIматал тIаде чвахаги.
Шукруги сабруги - кIиябго нигIмат, -
Надирго гурого бихьулеб гьечIо.
ЗахIмалъи бачIиндал гьеб цо лахIзаталъ
ХIакъикъияб сабру букIунеб буго.
Щиб хIал щвананиги, кибе кканиги,
Шукру гьаби буго бищун рекъараб.
НигIматалъухъ хIамдни щивас гьабула,
Мусибаталъеги гьабизе кколеб.
ХIелун кверал ритIун бекараб ракIалъ
ГIодун, берал чвахун гьабила шукру.
Гьедин гьабулареб гIибадаталъул
Пайда дагь букIуна, ихлас гьечIони.
