Миллаталъул церехъаби

Ракьулъ кьалбаз гъветӀ гӀадин,
Гъункун росу-ракь ккурал,
РукӀуна жиб-жиб бакӀалъ
Жигарал церехъаби.

Цо рахънисан лъим гӀадин
ЛъикӀлъун гӀумру чвахизе,
Чангиял сахаватго
Свак лъачӀого къеркьола.

Саказ кьоял кинигин,
Кьурабаз мугӀрул гӀадин,
МагӀарул тӀабигӀатгун
ТӀолго миллат гьез ккола.

МугӀрузул гӀадаталги,
ГӀаданлъи, яхӀ-намусги,
Ясбер гӀадин цӀунулел
ЦӀумал, мугӀрул гьел ккола.

ЦӀвабилъун кунчӀи бакун,
Канлъи халкъалъе кьолел,
Хадусел наслабазе
НасихӀатчагӀиги гьел.

Нусраталъе хӀадурал,
ХӀалаеги гӀедерал.
ХӀасилаб хӀалтӀиялъул
ХӀаракатчагӀиги гьел.

ХӀажаталъур ратулел,
Тухалалъе рортулел,
Тарих бечед гьабулел
Багьадурзабиги гьел.

БетӀергьанас гьунар кьун,
Гьаб ракьалде ритӀарал,
РитӀухълъиялъул нухда
Нур балел бахӀарзал гьел.

Квералда килщал гӀадин,
Киналго гьел цолъани,
Цониги къуваталъ нилъ
Къуркьизе гьариларо.

САГӀИД ОРДАШОВ