Вац Абусупяниде

Ассаламу гIалайкум, хIурматияб «Ас-салам» газеталъул редакция. Дун йиго анлъго вацасда гьоркьой гIурай яц. Нижер эмен Дибиров Асилдар вукIана 40 соналъ школалда мугIалимлъи гьабурав чи, эбел - НустIапаева ТIинасги йикIана цIакъ бажари бугей, чанго бакIазда хIалтIарай, нижееги берцинаб тарбия гьабурай гIадан. Вацалги эбел-инсул нухдасан ана, гIадамазда гьоркьор гьел хIажалъи ккарасул хьолбохъ кидаго эхетарал, исламияб нух ккурал руго.

Нижер бищун кIудияв вац Абусупян вуго Санкт-Петербургалда, институталъул мугIалимлъун, исана гьев ректорлъунги тIамуна. Гьединлъидал, дие бокьун буго, газета гьоркьоб ккун, вац Абусупяние барки гьабун чанго рагIи абизе.

Вацал гIемер гьечIо,
Нусгоял ругониги,
Нусгоясул бакI ккурал,
Анлъго вукIун чIухIула!

ЧIахIиял хъулухъазги,
Борхатаб къадруялъги,
Пахрулъи-гогьлъи кьечIев,
Нижер вац – Абусупян.

ГIелмуялъул гъеж ккурав,
ГIаданлъидул квер ккурав,
МагIарул ияхI ккурав,
Анкьракьалъул гIалимчи.

УхIдил кIкIалахъ рахъарал,
Къадруял бихьиназул,
Цебесеб кьерда руго,
Дур цIарги, дур гьунарги,

Асидада камигун,
Нижей дадал бакI ккурав,
Дудаса рохарал ниж,
Дудаса чIухIарал ниж!

Нилъей дугIа камилай,
Аллагьасда  гьардолей,
ТIинасбуба йохиялъ,
МагIу бацIцIуней йиго.

Дур бегIераб къаламги,
Дур къадруяб каламги,
Камун ниж хутIугеги,
Халатал соназ жеги.

Щиб жо магIаруласе,
Лъабго нухалъ къого сон?
Лъабнусгоги хIалалаб,
Дир гIадинав вацасе.

Баркула гьавураб къо,
Хъулухъалъул борхалъи!
БетIергьанас цIунаги,
Мунги агьлу-хъизамги.

Сахлъи кьеги щулияб,
Сонал кьеги гIемерал,
ГIумру кьеги рахIатаб,
Огь, кигIан лъикI мун вукIин!

П. АСИЛДАРОВНА, ЛЪАРАТIА РАЙОНАЛЪУЛ ГЬИНДУХЪ РОСУ