Напс лъадари

Диргун чед бекуге чорокав чияс,

Чияр гъинги кванан кепал росулес.

Дун гьудуллъун ккоге гьалмагъ гуккулес,

МацIазул тIогьиса гьури биччалес.

Дий хьолбохъ вокьула ракI гIатIидав чи,

РекIелъ гъиз гьечIого хабар бицунев.

Сапаралъ унелъул цадахъ вокьула,

Вакъунги, къечонги къо хIехьолев чи.

Ургъел бикьиялъе гIакъил вокьула,

ХIалтIи гьабулелъулъ устар вищила.

ЖамгIиял гIуцIабалъ цIикIкIаралъ чIела,

Иман бугездаса мисал босила.

Нилъей бокьулареб чидай гьабуге,

Дукьаго къолев чи хIакъир гьавуге.

Сабру цебе гьабе, ццим нахъе къулчIе,

ГIакълу ботIролъ босун напс бацIад цIуне.

КIудиясул адаб рехун кIалъаге,

ГьитIинал тарбия кьун сваказаре.

Кьураб рагIиялъе хилиплъуге мун,

Квешлъи гьабиялде ракI гьесуге дур.

Церехун рехсарал лъикIал гIамалал,

Чорхолъ рессун хадуб къадру борхула.

ЛъикIлъи гьабиялде напс лъадаризе,

Лъай-гIакълу нижей кье, хирияв Аллагь.

Сулайман МухIаммаднуров, ЦIиликь росу