Дагъистаниязде хитIаб
ХIурматиял диналъул вацал ва яцал, Дагъистаналда бараб чвахунцIадалъ гьабураб къварилъи нилъее ккола иргадулаб хIалбихьилъун.
ТIоцебесеб иргаялда, гIезегIан чи махIрумлъана мина-карталдаса ва магIишаталдаса. Гьайгьай, гьебги ккола тIаде тIамураб хIалбихьилъун.
КIиабизе, тIабигIияб балагьалдалъун зарал ккечIезеги буго гьеб хIалбихьилъун, гьезул гьелдехун бугеб бербалагьи загьир гьабизелъун.
Балагьалде ккараз гуребги, бокьараб цогидаб хIалалде ккаразги, ТIадегIанасул амру къабул гьабизе беццараб буго ва хьулги лъезе ккола лъикIаб букIинеселде.
ТIабигIияб балагьалде ккаразе, сундалъун бугониги, кумек гьабуразе кьезе бокьун буго ракI-ракIалъулаб баркала.
Мадугьалихъ ругел регионаздаса, улкаялъул цогидалги бакIаздаса, хIатта Палестинаялдасацин гIадамал кIалъан рачIана ва моралиябгун материалияб квербакъи гьабуна. КIудияб баркала буго киназего.
Дагъистанияздаги абила, гьаб дунялалъул пикру гьабеян, кумек гьабеян ва гьел лъеде гъоркье ккаразе бажарараб кумек гьабейилан. Гьединал балагьаз нилъ цолъизарула, нижедаги гьеб чанго нухалда бихьана. Жакъа дицаги ахIулел руго киналго цолъизе ва цадахъ рахъун бажарарас бажараб гьабизе.
Аллагьас кумек гьабеги.
