Хаслихълъиялъухъ гьоболлъухъ
Хаслихълъиялъухъ гьоболлъухъ
Хаслихълъи тIаде щведал цо-цо унтабиги загьирлъула. Гьеб буго гьава-бакъ хисиялда бараб жо. Риидалил хинаб заманалда эркенго рукIарал гIадамал, хаслихълъиялъул гьогьомиялдегун цIадазул риччелазде бигьаго ругьунлъуларо ва гьединаб хIалалъ къаркъалаялъул низамги хисизабула. Гьединаб заманалда иммунитет загIиплъула, гьелда бан цо-цо унтабиги загьирлъула.
Хаслихъе рагъарула квачалъул унтаби. Макьихин, мегIерччин, ухIуди бакки, цIа бахин бищунго тIиритIарал унтабилъун ккола гьаб заманалда. Гьединаб мехалъ тохтурзабаз лъикIаблъун бихьизабулеб буго хIалтIулгун хIухьбахъиялъул заманалда хадуб хъаравуллъи кквеян, цIакъго гIорхъолъа иналдаса цIунун. Микьго сагIаталъгIаги кьижизе кколин рикIкIуна тохтурзабаз.
Кванил низамги цIунизе кколин абула гьез. Кванилъ букIине рекъараб буго белковияб (гьан, ччугIа, ханал) квен, шарил ва хурдузул нах, гьединго рахьдал нигIматал (бетарахь, нису, щар), сокал ва пихъалгун овощал. Витаминал хIалтIизаричIогоги гIоларо, хасго А, Е ва С.
Иммунитет щулалъиялъе кумек ккола бацIцIадаб гьава бугеб бакIалда хьвадиялъ. Гьединго черх щула гьабула контрастнияб душ гьабун къаркъала лъадариялъги.
КъватIул унти тIибитIараб заманалда гIемерал гIадамал данделъараб бакIазде иналдаса цIунун чIезе ккола.
Цоги, лъикIаблъун бихьизабулеб буго хинаб ретIел ретIи.
