Аварагасухъе ﷺ щвезе ин
Аварагасухъе ﷺ щвезе ин
Аварагасул ﷺ хабаде зиярат гьабиялъул руго цIунизе кколел хасал адабал. Зиярат гьабизе ракIалде ккедал ният гьабила хирияб мажгиталдеги хирияб хабадеги зиярат гьабизе.
Мадинаялде жаниве лъугьиналде цин черх чурила, бацIцIадаб ретIел ретIила. Мадинаялъул хиралъи ракIалде щвезабила, ай гьеб Аллагьас жиндир хирияв ХIабибасдалъун хира гьабураб ракь букIин. Цинги мажгиталъуве лъугьиндал хирияб Равзаялде къасд гьабила ва 2 ракагIат тахIият бала хирияб хобалдаги минбаралдаги гьоркъоб. Цинги хирияб хобалде аскIове гIагарлъидал, къадазда кверал рахъиларо, гIемерисел жагьилзабаз гьабулеб гIадин.
Дагьав рикIкIад чIела хабадаса 4 натIалъул къадаралъ, бералги гIодоре ралагьун яги къанщун, хирияв Аварагасул ﷺ кIодолъи, хиралъи, гьесул гьайбат ракIалде щвезабун. Цинги салам кьела Аварагасе ﷺ, гьаракь борхичIого. Цинги гьал рагIабиги абила: «Дица нугIлъи гьабула, хIакълъунго, жиндие лагълъи гьабизе кколев магIбуд гьечIин, вати тIадав Аллагь гурого ва жеги дица нугIлъи гьабула, хIакълъунго, МухIаммад ﷺ, Аллагьасул лагъ ва дин малъизе витIарав чапар вугин. Дица нугIлъи гьабула, я Бичасул Авараг ﷺ, хIакълъунго, дуца дур БетIергьанасул рисалат халкъалъухъе щвезабунин, дур умматалъе дуца насихIатги гьабунин, дурго БетIергьанасул нухде дуца халкъги ахIанин хIикматалдалъун ва берцинаб рагIиялдалъун, дуца Аллагьасе лагълъиги гьабунин хвел тIаде гIунтIизегIан. Аллагьас дудаги, агьлуялдаги, асхIабзабаздаги Живго разияб, Жиндиего бокьухъе салатги саламги лъеги», - абун.
Цинги къилбаялде вуссина, хобалде мугъ рехиларедухъ довегIанги къан.
Кверал цереккун хIелун дугIа гьабила ва дуегоги, агьлу-хъизаналъеги, диналъул вац-яцазеги, ай дунял-ахираталъул лъикIабщинаб гьарила.
