ИсмагIил аварагас ирсалъе тараб
Аварагас ﷺ баян гьабун буго чуязул хиралъи ва гьезул пайдаби. ГIабдуллагь бин Жаририца бицана: «Аллагьасул расулас чол надалда кверги бахъун абуна: «Къиямасеб къо чIезегIан чуязулъ кинабниги лъикIлъи буго, гьелдалъун ажруги гъаниматги щола», - ян.
Аварагасе ﷺ хъулухъ гьабун вукIарав Анасица бицана: «Бичасул расуласе ﷺ бищунго бокьулеб хIайван чу букIана», - ян.
Хъвалеб буго чу гIалхул хIайванлъун букIанин. Аллагьас ﷻ Ибрагьим аварагасеги ИсмагIилиеги КагIба борхизабизе изну кьедал, Аллагьас ﷻ гьезда абуна: «Дица ﷻ нужее цо хазина буго нахъе цIунун, гьеб къватIибе бахъеян нужеца дугIа гьабе», - абун. Гьез дугIа гьабидал, дунялалда тIад ругелщинал чуял, Аллагьас ﷻ гьезие мутIигI гьаруна. Гьелъие гIоло хирияв МухIаммад аварагас ﷺ абулаан: «Нуж чода рекIа, гьеб буго нужее ИсмагIил аварагас ирсалъе тараб хIайван», - абун.
СагIлабияс бицараб хIадисалда буго: «Аллагьас ﷻ щибаб рогьалида чуязе дугIа гьабизе изну кьола ва гьез гьарула: «Я, БетIергьан Аллагь ﷻ! Щив чи вугониги дун гьудуллъун ккун, дир бетIергьанлъун вахъун, Дуца ﷻ дун гьабе гьесие, жиндирго агьлуялъулъги малалъулъги бищун бокьулеблъун», - абун.
Абу-Аюбил Ансарияс бицана: «Хирияв аварагасухъе ﷺ гIалхул гIарабияв вачIана ва гьикъана: «Дие чуял рокьула, Алжаналда чуял рукIунищ?» - абун. Аварагас ﷺ гьесда абуна: «Мун Алжаналде лъугьараб мехалъ, дуда аскIобе бачIине буго якъуталъул куркьбал ругеб чу. Гьелда тIадги рекIун мун воржине вуго дуего бокьараб бакIалде», - ян.
Аварагасул ﷺ рукIарал чуял
«Сакб». Гьеб чодаги рекIун хирияв авараг ﷺ гIахьаллъана УхIудалъул гъазаваталда. Гьелъул надалда букIана хъахIаб тIанкI, хIатIазда рукIана, курхьен барал гIадал хъахIал, берцинал хIуччал.
«Лизаз». Гьеб чу аварагасе ﷺ сайгъат гьабун букIана Мукъавкъис ханас.
«Муртажиз», «ЛахIиф», «Зариб», «Зарс» абун цIар бугелги чуял рукIана.
«Вард» букIана аварагасе ﷺ Тамиму Дарияс сайгъат гьабураб, хадуб ГIумар-асхIабасе жинцаги кьураб.
«СабхIат» ва «БахIр» рукIана кутакалда рекерулел чуял. Гьездаги рекIун хирияв авараг ﷺ чанго нухалъ къецазда цеве ккана. Хирияс ﷺ , «БахIр» абуралъул надалда кверги бахъун, абулаан: «Мун, хIакъикъаталдаги, ралъад буго», - ян.
