ЧIегIеркари – тIабигIияб антисептик
ЧIегIеркари – тIабигIияб антисептик
ЧIегIеркари (черника) ккола витаминазул гъансито. Гьелъулъ гIезегIан буго фосфор, марганец, магний, кальций гIадал химиялъулал гIуцIаби. Гьелъулъ руго тIабигIиял антиоксидантал, гьез цIунула батIи-батIиял радикалаздаса хасго ругъун, гьорой (опухоль) лъугьиналдаса, рекIелгун бидурихьазда унтабазе ва канлъуе гьабула кумек.
Халкъалда гьоркьоб чIегIеркари машгьураб буго канлъуе кумек гьабулеб нигIмат хIисабалда. Амма гIалимзабаз абулеб буго гьелъ беразе пайда гьаби гурони, канлъи бачIинабиялъе кумек гьабуларин абун. ЧIегIеркариялъ лъикIлъизабула беразул бидурихьазул хIалтIи, сетчаткаялда гъатал лъугьиналъул хIинкъиги дагь гьабула.
Гьелъулъ буго заралиял шлаказдаса, цIамудаса цIунулеб пектин абураб гIуцIи. Гьеб рикIкIуна тIабигIияб антисептиклъун ва антибиотиклъун. Гьеб яги гьелъул тIанхазул гьабураб гьагIу хIалтIизабизе бегьула хъегIулеб мехалда яги щекъер унтидал.
ГIатIгоябгун бакъвараб гьелъ кумек гьабула диарея, гастрит, язва гIадал унтабазда данде. Гьелъул тIанхаз кумек гьабула диабеталъе, бидулъ чакрил къадар гIодобе ккезабиялъе. ХIалтIизабизе бегьула тIуладагун ццидал къвачIида унтаби лъугьиндал. Квен бихIинеги гьабула, иммунитетги борхизабула. Кваналалде цебе чуризеги лъикIаб гьечIо.
Цогидал пихъалго гIадин гьебги хIалтIизабула косметикаялдаги. Кумек гьабула тIом тамах гьабизе, гьорой гIодобе буссинабизе.
Гьеб кваназе лъикIаб гьечIо кIващул нухазда унти бугезе ва пунцIилаялда ганчIал ругезе.
Кваназеги ккола гIурхъи цIунун, ай гIемер кваназе беццараб гьечIо. ГIемер кванани аллергия ва гъиз бакъвай лъугьине рес буго.
Чакарги жубан морозильникалъуб лъун яги бакъвазабун цIунизе бегьула.
