Нужеца гьездалъун ахIи бай
Нужеца гьездалъун ахIи бай
Цересел номеразда нилъеца байбихьи гьабун букIана Аллагьасул ﷻ берцинал цIарал рехсезе. Гьениб баян гьабун букIана тIоцебесеб лъебералда ичIго цIаралъул.
40. Аль-Мукъиту - кинабго халкъалъухъе къут (бетIер бахъулеб жо) щвезабулев, кинабго жоялъе къадар чIезабулев, кумек кьолев, хIал кьолев.
41. Аль-ХIасибу - хIисаб гьабулев, лагъзадерие гIей гьабулев, Жинда мугъчIвай гьабурасе гIей гьабулев, Жиндир цIобалдалъун лагъзал гIорцIизарулев, гьездаса балагьал тIаса росулев.
42. Аль-Жалилу - хIакъикъияб кIодолъи бугев, киналго камилалщинал сифатал Жиндир ругев, кинабго гIунгутIиялдаса вацIцIадав.
43. Аль-Кариму - лъикIлъи гIемерав, сахаватав, кигIан кьуниги Жиндир нигIмат тIагIунарев, хирияв, хиралъиялъул киналго рахъал жанире рачунев, Жиндир гьабулебщинаб жо реццалъе мустахIикъав.
44. Ар-Ракъибу - лагъзадерил хIалазул хъаравуллъи гьабулев, гьезул ишал лъалев, гьез гьабулебщинаб хъвалев, Жиндир цIуниялдаса щибго жо борчIун кколарев.
45. Аль-Мужибу - дугIа къабул гьабулев, гьарараб кьолев, Жиндаса гурого жо гьаруларев.
46. Аль-ВасигIу - Жиндир рикъзи кинабго халкъалъе гIатIидав, рахIмат тIолабго жоялъе гIатIидав, кинабго жоялда сверун лъугьарав.
47. Аль-ХIакиму - хIикматалдаса бахъараб щибго жо гьабуларев, Жиндир тадбир битIарав, киналго ишазул хIакъикъатазул жаниса рахъалги лъалев, Жинца къадар гьабураб хIукму цIакъ лъалев, гьабурабщинаб жоги, къотIараб хIукмуги кинабго лъикIаб, гIадлияб, хIикматияб букIунев.
48. Аль-Вадуду - Жиндие лагъзалги рокьулев, вализабазул ракIалъе Живги вокьулев.
49. Аль-Мажиду - кIодолъиялъул рахъалъ бищун тIадегIанав, лъикIлъи гIемерав, кьей гьарзаяв, пайда кIудияв.
50. Аль-БагIису - къиямасеб къоялъ халкъ тIаде бахъинабулев, халкъалъухъе илчизаби ритIарав, лагъзадерие кумек битIулев.
