Нужеца гьездалъун ахIи бай
Цересел номеразда нилъеца байбихьи гьабун букIана Аллагьасул ﷻ берцинал цIарал рехсезе. Гьениб баян гьабун букIана тIоцебесеб кIикъоялда анцIго цIаралъул.
51. Аш-Шагьиду - кинабго жоялда аскIов вугев, Жиндаса щибго рикIкIалъуларев, кинабго жоялде тIаде ваккулев, кинабго жо батIа-батIа гьабун бихьулев, лъалев.
52. Аль-ХIакъкъу - Жив хIакъав, Жиндир калимабаздалъун хIакъаб жо хIакъаб букIин чIезабулев, Жиндир вализаби хIакълъизарулев, Жиндие лагълъи гьабизе кколев.
53. Аль-Вакилу - Жинда мугъчIвай гьабизе кколев, мугъчIвай гьабурасе гIей гьабулев, Гьесдалъун гIей гьабурав чи рази гьавулев.
54. Аль-Къавиййу - тIубараб, рагIа-ракьанде щвараб, камилаб хIалкIолъиялъул бетIергьан, бергьарав, къоларев, кинабниги къуваталда тIадги Жиндир къуват бугев.
55. Аль-Матину - щулияв, къуватав жиндир хIукму билълъанхъизабизе боялде хIажалъуларев, кумек хIажалъуларев, кумекчи, хьибил кколев чи къваригIунарев.
56. Аль-Валиййу - жиндие мутIигIлъулел гIадамазе квербакъулев, гьел рокьулев вализабазе кумек гьабулев, тушбаби квегъулев, халкъалъул ишал тIаде росарав, гьел цIунулев.
57. Аль-ХIамиду - кинабго реццалъе мустахIикъав, кинабго хIалалъулъ жиндие рецц гьабизе кколев.
