Нужеца гьездалъун ахIи бай
Цересел номеразда нилъеца байбихьи гьабун букIана Аллагьасул ﷻ берцинал цIарал рехсезе. Гьениб баян гьабун букIана тIоцебесеб лъеберго цIаралъул.
31. Аль-ЛатIифу - Жиндир лагъзадерие лъикIлъи гьабулев, гьезда гурхIулев, гьезие бигьалъи гьабулев, гьел хьихьулев, гьезда цIоб лъолев.
32. Аль-Хабиру - тIасанго гIадин жанисанги тIолабго лъалев, Жиндие балъгояб жого гьечIев, Жиндир лъаялдаса щибго рикIкIалъуларев, букIарабги букIинесебги Жинда лъалев.
33. Аль-ХIалиму - хIалимав, гIасилъарав чиясе гIакъуба кьечIого виччан толев, мунагьал рахчулев, мутIигIасего гIадин гIасиясеги рикъзи кьолев.
34. Аль-ГIазиму - кIудияв, Жиндир кIодолъиялъе байбихьи гьечIев, Жиндир тIадегIанлъиялъе гIорхъи гьечIев, Жинда релълъараб жоги гьечIев.
35. Аль-Гъафуру - Жиндица лагъзадерил цIакъ мунагьал рахчулев, гьезул хатIалъабазда тIаса лъугьунев.
36. Аш-Шакуру - лагъзадерица гьабураб дагьаб гIамалалъухъ цIикIкIун кири хъвалев, гьезул гIамал тIубазабулев, гьезда тIаса лъугьунев.
37. Аль-ГIалиййу - тIадегIанав, къадру кIудияв, Жиндир тIадегIанлъиялъе сифат гьабун хIалкIоларев, ращадал яги жинда дандечIей гьабулел гIахьалчагIи рукIиналдаса тIадегIанав, Жиндир заталъеги, гучалъеги, хIалалъеги киналго тIадегIанлъаби мустахIикъал ругев.
38. Аль-Кабиру - тIадегIанав, кIудияв, сифатазулъги афгIалазулъги кIодолъи хIакъав, сундего хIажалъуларев, сунцаго гIажиз гьавуларев, Жинда релълъараб щибго жо гьечIев.
39. Аль-ХIафизу - мискъала-заррагIанасеб жо гъоркь течIого кинабго Жинца цIунулев, Жиндир цIуни тIаса унарев, тIолабго жо цIунун хьихьулев.
