Аллагь ﷻ вукIин кин лъалеб?
Аллагь ﷻ вукIин кин лъалеб?
Аллагь ﷻ вукIин лъала Гьес бижун бугеб гIаламалъухъ балагьун. Киназдаго бихьулеб жо буго гIисинал заррабаздаса байбихьун зоб-ракь, бакъ-моцI, цIваби, галактикаби, магIданал, хурдул, гъутIби, хIайванал, гIадамал, гьава, гIазу, гьурал, цIадал, мугIрул, ралъадал, гIорал - кинабниги жоялъулъ бихьулеб буго гIажаибго бижунги низамалда гIуцIунги букIин.
Гьаб киналъго нугIлъи гьабула гьеб бижарав, гьеб гIуцIарав ва гьеб низамалда хьвадизабулев цогояв Аллагь ﷻ вукIиналъеги, Гьев чIагояв, кинабго бокьулев, сундаго хIалкIолев, кинабго лъалев Халикъ вукIиналъеги. Масала, цо машинаялде яги сагIтиде нилъ балагьани, гьеб кIиялъго нилъеда бицуна гьел гьарурав устар вукIинги, гьаризе гIураб бажари-лъай, бокьи бугев чIагояв гьев устар вукIаравлъиги.
Хасго гьадинал мисалал рачун лъималаздаги малъизе ккола диналъул битIараб гIакъида. Гурони гьезда жаниб цогидаз батIияб игIтикъад лъола.
КантIизари
1.ТIадегIанав Аллагьасул ﷻ хIакъикъияб кIодолъиялдаги, тIадегIанлъиялдаги, камиллъиялдаги живго Аллагь ﷻ гурони нахъ гIунтIуларо.
2. Инсанас Аллагьасул ﷻ заталъул пикру гьабун, Гьев цеве чIезавизе лъугьаниги, Аллагь ﷻ гьелда релълъарав гьечIо, инсанасул пикру кинго Гьесда нахъ гIунтIизе рес гьечIелъулха. Гьединлъидал Гьесул заталъулъ пикру гьабулев чи мекъи ккола.
3. ТIадегIанав Аллагьасул 99 берцинаб цIар буго, гьел рикIкIарав чи Алжаналъуве лъугьуна.
4. Аллагь ﷻ цо вугилан абураб жоялъул магIна ккола, Гьев цо вуго заталъулъги, сифатазулъги, афгIалазулъгиян (гьарулел ишазулъ) абураб. Гьесул зат щибниги жоялъулъ гьечIо, Жив тун батIияб жо Гьесул заталъулъги гьечIо, Гьесул зат цогидаб жо гIадин бутIабаздасаги лугбаздасаги гIуцIараб гьечIо, бутIабазде бикь-бикьулебги гьечIо. Гьесул цониги сифат цогидаб жоялъулъги гьечIо, цогидаб жоялъул сифат Гьесда жанибги гьечIо. Гьесул сифаталги цо-цо гурони гьечIо. Гьесул лъай, бокьи, хIалкIолъи, бихьи, рагIи, кIалъай, щибаб сифат цо-цо буго. Цо лъай абураб сифаталдалъун Гьесда кинабго лъала. Цо бокьи абураб сифаталдалъун Гьесие кинабго бокьула ва гьединго цо-цо сифаталдалъун кинабго бихьула, кинабго рагIула, кинабго абула. Гьес бижулеб жоялъулъ, гьабулеб ишалъулъ Гьесдехун гIахьаллъи гьабулеб щибго жоги гьечIоян абураб магIна ккола Аллагь ﷻ цо вугилан абиялъул.
