Жагьлу цIикIкIин
Жагьлу цIикIкIин
Къиямасеб къо тIаде щвеялъул гIаламатаздасан ккола гIелму тIагIин ва жагьлу цIикIкIин. ТIадегIанав Аллагьас ﷻ гIалимзабазул рекIелъа гIелму бахъуларо ва амма гIалимзаби тIаса росула, цинги гIелмуги тIагIуна. Гьеб сабаблъун ракьалда жагьлу цIикIкIуна.
Къиямасеб къоялъул гIаламатаздасан ккола лъикIал, гIелму бугел, Аллагьасукьа ﷻ хIинкъарал гIадамал дагьлъи ва квешал пасикъзаби цIикIкIин. Ахир къиямасеб къо тIаде щведал гьаб ракьалда пасикъзаби гурони хутIизе гьечIо.
ГIабдуллагь ибн ГIамрица бицана аварагас ﷺ абунин: «ЛъикIал чагIи тIаса росун гурони къиямасеб къо тIаде щоларо. Цинги, лъикIалде амруги гьабуларел, квешалдасаги нахъчIваларел пасикъзаби хутIила». (АхIмад)
Исламалъул дагьабниги лъай бугел бусурбаби ракьалда хутIуларо. ГIабдуллагь ибн ГIамр ибн Ал-ГIасидасан бицана аварагас ﷺ абунин: «ТIадегIанав Аллагьас лагъзадеридаса гIицIго гIелму нахъе босуларо, кинниги гIалимзаби гьаб ракьалдаса нахъе рачиналдалъун босула гIелмуги нахъе. ТIадегIанав Аллагьас киналниги гIалимзаби нахъе рачиндал, гIадамаз байбихьизе буго жидеего бутIруллъун жагьилзаби рищизе. Гьезие суалал кьезе руго ва щибго гIелмуги гьечIого гьез фатваби кьезе руго. Гьеб сабаблъун битIараб нухдаса къосине руго ва цогидалги гьез къосинаризе руго», - ян. (Бухари, Муслим)
Бищун лъикIаб заман, аварагас ﷺ, асхIабзабаз ва табигIиназ гIумру гьабулеб букIараб лъабго гIасру букIана. Гьелъулги бищун лъикIаб заман, аварагас ﷺ гIумру гьабулеб букIараб мех буго. ГIабдуллагь ибн МасгIудидасан бицана аварагас ﷺ абунин: «Дир гIасруялъул гIадамал бищун лъикIал руго, цинги гьезда хадур рачIарал, цингиги гьезда хадур рачIарал», - илан. (Бухари, Муслим)
