Жигарав муъминчи вукIана
Жигарав муъминчи вукIана
Нилъ киналго Аллагьас рижарал руго, ахир Гьесде руссинеги руго.
КIиабилеб февралалда, хирияб рузман къоялъ, Аллагьасул къадар щвана Шамил районалъул Гьандихъ росдал школалъул директор, лъикIав муъминчи Гъазалиев МухIаммадие. Гьес жиндир тIолабго гIумру кьуна гIун бачIунеб гIелалъе битIараб тарбия кьеялъе. Гьес ирсалъе нахъе тана гьелда сверухъ школлъималазе хIадур гьабураб учебникги. Жиндир мугIалимлъиялъун нух гьес байбихьана 1963 соналда, школалда мугIалимлъун хIалтIиялдаса. 1979 соналдаса нахъе нухмалъи гьабуна росдал гьоркьохъеб школалъе.
Тарбия кьеялъул хIалтIудаго цадахъ МухIаммад вукIана росдал гIалимзабазул тарих бокьулев, гьелда сверухъ кIудияб хIалтIи гьабулев жамгIияв хIаракатчиги. Гьесул квералъ хъван басмаялде бахъун халкъалъухъе щвана накъшубандиябгун шазалияб тIарикъаталъул устар Гьандихъа ХIумайд-афандиясул хIакъалъулъ гIурус ва магIарул мацIазда хъвараб тIехь.
Нижер редакциялъулгунги букIана МухIаммадил лъикIаб бухьен. Тарихалда, тарбиялда ва жамгIиял ишазда хурхарал макъалаби рачIунаан гьес «Ас-саламалде».
Росуцоял цIакъ разиго рукIунаан гьесдаса жамагIаталда хурхараб кинаб масъала бугониги жинда бажарараб кумек гьабун вахъун чIолин абун. ХIатта Гьандихъ бугеб мадрасаялъул хIалтIи нухда бачинеги кIудияб кумек щолаан МухIаммадидасан.
"Ас-салам" газеталъул редакциялъул коллективалъ, гьесул гIагарлъиялда, росуцоязда ва тIолабго районалъулго жамагIаталда зигара балеб буго халкъалъе пайдаяв гьев инсан нилъедаса ватIалъиялда бан. Аллагьас иманалда тIовитIун ватаги, нахъе ругезе халатаб гIумру кьеги.
