Я дир вас!
«Я дир вас! Дуца как бай гIужда, шартIалги тIуразарун, хIузуралда (ТIадегIанав Аллагьасде иман лъун хадуб, лугбаз гьабулеб гIибадаталъул бищун хирияб ва тIоцебе инсанасда тIалъулеб гьеб как бугелъул).
Дуца гIадамазде амруги гьабе, шаргIалъ беццараб, гIакълуялда рекъараб, лагъ жинца Аллагьасде вачунеб лъикIабщиналдалъун. Дуца гIадамал нахъги чIвай, шаргIалъ хIарам гьабураб, какарал, гIакълуялда рекъоларел, ТIадегIанав Аллагьасдаса лагъ жинца машгъул гьавулел, къабихIал гIамалаздаса, пишабаздаса. ХIалкIолеб бугони – квералдалъун, кIолеб гьечIони – кIалалдалъун, гьединги кIвечIони - ракIалдалъун.
Дуца сабруги гьабе тIаде рачIарал дунялалъул ургъалаби-пашманлъаби гIадал, унта-щокълъи гIадал, мискинлъи-пакъирлъи гIадал къварилъабазде. Хасго лъикIалдалъун амру, квешалдаса нагью дуца гьабулел гIадамаздасан бачIунеб захIмат-къварилъиялде. Гьал рехсарал умурал руго ТIадегIанав Аллагьас жидедалъун амру гьабурал, тIадал, кIвар цIикIкIарал умураздасан».
Гьаб рехсараб аят буго далиллъун цересел умматазеги тIагIат-гIибадаталъулъ рехсарал умурал бищунго цересел, кIвар цIикIкIарал рукIиналъе. Ва гьединго МухIаммадияб умматалъе баянги гьабулеб буго, жинца амру-нагью гьабулев чи, гьелдалъун бачIунеб захIмат-къварилъи бугони, гьелде сабру гьабулевлъун вукIине ккей.
«Мун гIадамаздехунги вусса, - ян абулеб буго Лукъманица васасде, – салам кьолелъул, кIалъай гьабулелъул; дандчIвараб мехалъ берцинаб гьумергун, тамахаб рагIигун. ЧIухIарал чагIаз гIадин, дуца гьездаса гьумер буссине гьабуге, гьел хIакъирлъун рихьун, хасго фукъарааздехун, дуца ращадги гьаре фукъараалги бечедал чагIиги».
Хадубги абулеб буго Лукъманица васасда: «Мун ракьалда тIад чIухIунги хьвадуге, ТIадегIанав Аллагьасе рокьуларо чIухIарал чагIи. Дуца вилълъанхъиялъулъги цIуне гьоркьохъеб къагIида, ай цIакъго хехги гуреб, цIакъго хIинцги гуреб къагIида. Дуца, гIадамалгун кIалъалеб мехалъ, гьаракьги гIодобегIан гьабе, ай гьавугьин кIалъай, ахIдон кIалъачIого, хасго дудасаго чIахIиялгун кIалъалеб мехалъ.
Жиндилъ пайда гьечIеб жоялъулъги гьаракь борхизе дуца гьабуге [масала, жамагIаталда рагIизе хIажатаб къадаралдаса цIикIкIун имамас гьаракь борхизе гьабунгутIиялда релълъун]. Бищунго къабихIаб, рагIизе бокьулареб гьаракь хIамил буго».
Гьал васиятал Лукъманица васасе гьарурал ругин абун Къуръаналда рачIиналъул хIикмат буго, нилъ, ай МухIаммадияб уммат гьелде кантIизари, нилъее малъа-хъвай гьаби. Гьаб аяталда ишара гьабулел тIабигIатал цIуни рекъараб буго хасго гьаб заманалда жаниб.
Аллагьас кумек гьабеги.
ГIАБДУЛЛАГЬ МУХIАММАДОВ
