Калам къокъал, магIна гъваридал аварагасул ﷺ рагIаби
Калам къокъал, магIна гъваридал аварагасул ﷺ рагIаби
Бичасул аварагас ﷺ абуна:
– Исламалъ ва гьижраялъ бацIцIуна цебехун букIараб жо.
– Ислам тIадегIанлъула, гьелдаса цоги жо борхуларо.
– Жинда зулму гьабурасул дугIаялдаса цIуне.
– Квешав гьалмагъасдаса цIуне, гьесдалъун кьола дуе къимат.
– Мун цIуне хиянаталдаса, гьеб буго цогидасдехун пикру квеш гьаби.
– Нуж цIуне гъибаталдаса.
– Нуж цIуне квешаб агьлуялдаса яхъарай берцинай гIаданалдаса.
– Иман буго кIиго тайпаялда. Бащдаб - щукруялъулъ ва цогидаб бащалъи - сабруялъулъ.
– ЛъикIлъи буго лъикIаб тIабигIат. Мунагь буго рекIеда хIунсулеб ва гIадамал жинде раккизе бокьулареб.
– Нужерго умумузе лъикIлъи гьабе, нужер лъималаз нужееги гьабила. Нужерго лъудбузе лъикIаллъун рукIа, нужерго ясазеги лъикIаллъун рукIина.
– Дун витIана авараглъун гIадамазулгун хIал рекъезабизе.
– Балагь бухьун буго кIалъаялда, ай кколареб бициналъ питнаялде рачуна.
– НугIзал рачине ккола жинца дагIба балес, гьа кьола инкар ккурасе.
– Квешлъи тей садакъа буго.
– Дуда Аллагь лъай, ай Гьев рехсе мун лъикI вукIаго, Гьесда мун лъала захIматаб хIалалде ккедал.
– Дуда лъай, щвечIеб жо дуе насибаб букIараб гуро. Дуе щвараб жо мекъи ккезеги букIинчIо.
– Дуда лъай Аллагьасул рахъалдаса кумек сабруялдалъун букIуна. Бигьалъи щвей захIмалъиялда хадуб букIуна.
– ЗахIмалъиялда хадуб бигьалъи камуларо.
– ЧIужуялъул лагъасул талихI къана.
– Нужеца ккве щулияб бухьен, ай Ла илагьа иллаллагь.
– Нужеца цоцазе сайгъатал кье, нуж цоцазе рокьила.
