Салам кьезе бахиллъуге
ХIурматияб исламияб уммат! Бусурбабазул цоцаздехун гьабулеб кIалъай байбихьизе суннатаб буго «Ассаламу гIалайкум» абурал рагIабаздалъун. Гьелъул магIнаги ккола, унти-балагьаздаса цIунараб салам лъейги нужедайин абун дугIа гьаби. Гьеб гIадат нилъеда гьитIинго умумуз малъун лъала. Росдал харабаз, саламги кьечIого вачIарав гIоркьиласе, бадирчIваялцин гьарулаан цебе.
Гьанжейин абуни гьеб тарбия дагьабго чучун унеб буго. Хасго шагьаразда тIубанго лъугIун унеб бугин кколеб хIал буго. Салам кьолезги жидедаго лъале-хъвалев чи дандчIвани кьун толеб буго. Цояс Бичасул Аварагасда ﷺ цIехон буго, кинаб исламин лъикIаб бугебин абун. Хирияс ﷺ жаваб гьабун буго: «Дуца тIагIам кьей ва дудаго лъалесеги лъаларесеги салам кьейги ккола», - ян.
Салам кьей ккола жеги дугIа гьабиги. Гьелда хурхун Бичасул Аварагас ﷺ абулеб буго: «ГIадамазул бищунго гIажизав чи ккола дугIаялъе кIвахIалав. ГIадамазда гьоркьов бищунго бахилав чи вуго салам кьезе къарумав», - ян.
Цоги хIадисалда Бичасул Аварагас ﷺ абуна: «Нуж алжаналде унаро нужеца иман лъун гурони. Иманги нужер камиллъуларо цоцазе рокьун гурони. Дица бицинищ нужеда жиб гьабиялдалъун нуж цоцазе рокьулеб иш? Гьебги буго цоцазе нужеца салам кьей тIибитIизаби», - ян.
ГьабсагIат нилъее бищунго чара гьечIеб жо буго цоцаздехун рокьи цIикIкIинаби. Гьоркьоблъи лъикI гьечIел гIадамаз цоцазе салам кьолереблъи балъгояб жо гуро, амма гьезул цоясниги цебехун салам кьуни, гьоркьоб букIараб гьогьен гьороца босун арабгIадин гьезул рекъелги ккола. Бихьулищха салам кьеялда жаниб бугеб кIудияб баракатги хIикматги.
«Ассаламу гIалайкум» абурал рагIаби руго гьоркьохъеб къадар. Гьелъул камилаб къагIида лъазе рехселин Аварагасул ﷺ хIадис. ГIимран бин ХIусайн абурав асхIабас баян гьабуна хирияв Аварагасе ﷺ салам кьейги, гьес буссинабиги. «Цо чи вачIана хириясде ﷺ тIаде ва «Ассаламу гIалайкум» абуна. Гьесул саламги буссинабуна ва гьевги гIодов чIана. АнцIгойин абуна Бичасул Расулас ﷺ. Цоги чи вачIана хириясде тIаде ва, «Ассаламу гIалайкум варахIматуллагь», - ян абуна. Гьесиеги буссина хирияс ﷺ салам, гьевги гIодовчIана. Къогойин абуна Аварагас ﷺ. Лъабабилевги вачIана хириясде ﷺ тIаде ва, «Ассаламу гIалайкум варахIматуллагьи вабаракатугь», - ян абуна. Гьесиеги буссина хирияс ﷺ салам, гьевги гIодовчIана. Цинги Бичасул Аварагас ﷺ абуна лъебергойилан, ай лъеберго кири щванин абураб магIна ккола гьелъул. Гьединлъидал, анцIго босун течIого, лъеберго кири босизе хIаракат бахъизе рачIа киназго.
