РуцIцIун чIеялъулъ буго хвасарлъи
РуцIцIун чIеялъулъ буго хвасарлъи
Халкъалда гьоркьоб дагIба-къец ккей буго дунялалъул гIадатазул цояб. КигIан цIунун ругониги тунка-гIуси яги дагIба ккечIого хутIуларо. Гьеб ккун хадуб щиб гьабизе кколебали лъазабуни, гьелдаса бигьаго рорчIизе рес букIуна. Амма гьеб халат гьабуни, дунищин нахъе къазе кколев, дун витIарав вугин абун, керен бухун кIиявго чIани, гьелъул хIасил тункагIусиялде, хIатта чIвай-хъеялде ккезе рес буго. Кинха гьелдаса рорчIилел?
РачIа балагьилин гьелъул хIакъалъулъ Бичасул аварагас щиб абулеб бугебли. Аллагь жиндаса разилъаяв Абубакариде цо чи чанго нухалда кIалъана хьамиялъул рагIабаздалъун, свалат-салам лъеяв Аварагги аскIов вукIаго. Аллагь разилъаяв Абубакарги вукIана вуцIцIун чIун. Ахиралдаги Абубакарица дов чиясде данде рагIи абуна. Свалат-салам лъеяв Аварагги тIаде вахъана. Цинги Аллагь разилъаяв Абубакарица абуна:
«Я Аллагьасул Расул! Гьав чи диде хьандана, дица щибго жоги абичIо, мунги кIалъачIо, ахиралдаги дун досдехун кIалъайдал, мун тIаде вахъана?» - илан. Свалат-салам лъеяв Аварагас жаваб гьабуна: «Мун кIалъачIого чIаравгIан заманалъ, дуе гIоло гьев чиясе жаваб гьабулев малаик вукIана, мун кIалъайдал малаик нахъе ана, щайтIан бачIана, дунги тIаде вахъана», - ян.
Гьаб хIадисалда рехсараб руцIцIун чIеялъ гIемераб питнаялдаса хвасар гьарула. Цо чи цогидасде семулев яги вагъулев вугони, гьев вукIуна ццим бахъаравлъун яги жинде тIаде бачIараб цо кинаб бугониги амруялъ рахIатги хвезабун, жинцаго гьабулелъул ва абулелъул хъаравуллъи кквезе бажаруларевлъун. Гьединаб заманалда дандияв вуцIцIун чIани гьениб дагIба кколаро, кканиги гIемер халалъуларо. Гъов жив вагъулевги жиндирго лъикIаб гьечIеб пишаялдаса ракI бухIун хутIула, хIатта тIаса лъугьинги гьарула. Амма данде рагIи абун кIалъазе байбихьани, хIажат гьечIеб калам гIемер ккола. Хирияб хIадисалдаги буго: «ВуцIцIун чIарав хвасарлъана», – ян. Гьаб хIадисалда Бичасул аварагас баянго бицунеб буго вуцIцIун чIеялъ инсан хвасар гьавулевлъи.
Амма нилъеда жаниб бугеб чIухIиялъ, хIамабагьадурлъиялъ риччаларо руцIцIун рукIине. Гьагъав жояс жоги абун чIолев чийищин живин лъугьуна дагIбаялде. Амма хирияб хIадисалда жеги абулеб буго: «Хвасарлъиялъ, саламатго хутIиялдалъун вохизе бокьарав чи вуцIцIун вукIа», – ян. Гьединлъидал нилъеца чIухIи къинабизе хIаракат бахъила ва руцIцIун рукIиналде нилъгоги тIамила.
ГIАБДУЛЛАГЬ МУХIАММАДОВ,
