Аварагасул магIишат
ХIурматиял «Ас-салам» казият цIалулел. Гьаб заманалда, хасго кIиго чи данделъараб бакIалда, щивас бицуна жиндирго ругел къварилъабазул, ургъалабазул, захIмалъабазул. ГьабсагIаталда чара гьечIого хIажатал жал гIемер рукIун, гьел тIуразе гIарац гIоларого ругин букIуна гIемерисезул гIарз.
Гьебги, кIудияб, жинда жанир киналго санагIатал ругеб рукъги тун, гIорцIизегIан кваназе жоги нахъе букIаго, кинаб ретIилебали лъалареб хIалалда цоялдаса цояб лъикIаб парталалъул шкафги цIун, азабаралъуб рекIине машинги букIагойин гIарзал раккулел. Гьаб бакIалда дагьабго хIухьбахъиги гьабун, рачIа тIадруссинин Бичасул аварагасул заманалде. Балагьизин кинаб магIишаталъул хважаин гьев вукIаравали. Симак бин ХIарбидасан бицана, гьес абунин НугIман бин Баширица абулеб рагIанин: «Нуж гьечIищ бокьараб кванан ва гьекъон? Дида нужер авараг вихьана чехь цIезегIан кваназе чамасдак гьечIого», - ян.
Жиндаса Аллагь разилъай ГIаишатица абуна: «Ниж, ай МухIаммад аварагасул рукъалъул агьлу тIубараб моцIалъги рокъоб цIа бакичIого рукIунаан, лъимги чамасдакги кванан», - ян.
Гьебго хIадисалъул Бухари ва Муслимил риваяталда буго: «Жиндаса Аллагь разилъай ГIаишатица ГIурватида абуна:
- Ва, дир яцалъул вас, нижеда цIияб моцI бихьулаан, жеги бихьулаан ва цоги нухалъги бихьулаан, кIиго моцIида жаниб лъабго нухалда Бичасул аварагасул рукъзабахъ цIаги бакичIого. Цинги гьес гьикъана:
- Я, дир ада, нужеца гIумру кинха гьабулеб букIараб, - ян.
- Чамасдакги кванан, лъимги гьекъон. Аварагасул рукIана ансаразул мадугьалзаби, гьез аварагасе сайгъаталъе битIун бачIунаан рахь, гьебги гьекъолаан», - ян.
Абу ТIалхIатидасан бицунеб буго, жидеца Бичасул аварагасде гIарз бахъанила ракъун ругин абун. Гордеги борхун чахьалда бухьараб цо-цо гамачIги бихьизабуна нижеца гьесда. Цинги аварагас борхана жиндирго горде ва гьениб бугоан кIиго гамачI бухьун», - ян. Жиндаса Аллагь разилъай ГIаишатица бицараб цоги хIадисалда буго:
«МухIаммад аварагасул агьлу кIиго къоялъ цоцада хадуб пурчIинадул чед кванан гIорцIичIо», - ян.
Балагьеха гьанже нилъерго магIишатяшавалдеги. Гьадин гIорцIун ругел нилъ ццулъичIого, ракIал риццалъичIого кин рукIинел? Пикру гьабе нилъерго ругел гIарзазде. РачIа нилъ Аллагьас кьуралъе шукру гьабунгIаги рукIинин, гIемер зигардилел рукIинчIого.
Аллагьас кумек гьабеги!
ГIАБДУЛЛАГЬ МУХIАММАДОВ, «АС-САЛАМАЛЪУЛ» РЕДАКТОР
