Калам къокъал, магIна гIемерал рагIаби
Бичасул аварагас ﷺ абуна: – Дие кьун буго калам дагьаб, магIна гъваридаб калам. – Дуда лъалеб жоялъулъ мун Аллагьасукьа хIинкъа. – Мун Аллагьасукьа хIинкъа дуе захIмат букIаго ва бигьа букIаго. – Мун цIуне щаклъи ккезе рес бугел бакIаздаса.
– Нужер бищун гIакълу камилав – бищунго Аллагьасукьа хIинкъарав вуго.
– Нуж рикIкIалъе мехтелалдаса, гьеб буго кинабго квешлъиялъул кIул.
– ГIамалалъухъ кири – бихьараб гIакъубаялда рекъон букIуна.
– Нужеца дунял тIалаб гьаби берцин гьабе! Жив жиндие вижараб жо щивасе бигьа гьабун буго.
– ИхIсан ккола – дуца Аллагьасе Гьев вихьулев вугевгIадин гIибадат гьаби, дуда Гьев вихьулев ватичIони, Гьесда мун вихьулелъул.
– Дир умматалъул хилиплъи – рахIмат буго.
– Дурго мацI цIуне лъикIаб абиялдаса хутIизегIан.
– Дуца гIамал ихласалда гьабе – дуе гьеб дагьабги гIела.
– Аманат тIобитIе дуда божи гьабурасухъе, дуе хиянат гьабурасе хиянатги гьабуге.
– Дида БетIергьанас адаб малъана, гьеб манлъиги берцин гьабуна.
– Аллагьасе бокьидал жиндир лагъасе лъикIлъи гьабизе, гьесие диналъулъ бичIчIи, дунялалъулъ зугьд кьола ва жиндирго гIайибазде кантIизеги гьавула.
– Дуца квешлъи гьабидал гьелда хадуб лъикIлъи гьабе.
– Мун нечолев гьечIони, дуего бокьараб гьабе.
– Аллагьасул къадар тIаде щведал бер бецц гьабула.
– Нуж гурхIа – нужедаги гурхIила.
