Ризкъи кьолев
Къуръаналъул аятазда рукIуна инсанасда ракIалдецин кколарел илагьиял магӀнаби ва хIикматал. Гьел цIализе ккола пикруги гьабун. Сура «Зарияталда» бугеб лъабго аяталда буго: «Дица жиналги халкъги бижичIо, гьез Дие гӀибадат гьабизе гурони, гьезул ризкъиги Дие хӀажат гьечӀо, гьез Дие квен кьезеги къваригӀун гьечӀо», - ян.
Гьаб аяталда ТӀадегӀанав Аллагьас ﷻ бихьизабуна Жинца гӀадамалги жиналги Жиндие гӀибадат гьабизе рижарал рукӀин. Хадубги ТIадегIанав Аллагьас ﷻ абуна гьездаса ризкъи тӀалаб гьабулеб гьечIиланги.
ТӀадегӀанав Аллагьасда ﷻ Жиндир гIелмуялдалъун лъала гьезул (гӀадамазулги жундузулги) ургъел гьабизе кколел черхалъул тӀабигӀиял хӀажалъаби рукӀине рукӀин. Гьел хӀажалъабаз ракӀбацӀцӀадаб (Аллагьасе) гIибадат гьабизе квалквал гьабизе букIана. Цинги Аллагьас ﷻ гьездаса гьеб захIмалъи нахъе босула, гьез Гьесие гIибадат гьабизелъун. ХIакъикъаталдаги ризкъи кьолев Аллагь ﷻ вукIин лъазе ккола ракIчIун.
Хадубги, ТIадегIанав Аллагьас ﷻ абуна: «Дие гьезул ризкъи хӀажат гьечӀо», - ян.
БетIергьанас ﷻ жеги абуна: «Дие хӀажалъи гьечӀо гьез Дун кваназавизе», - ян. Щайгурелъул Жив вугин Къуватав ва Дидего гIей гьабулевлъун. Гьединлъидал, гьаб аят ТӀадегӀанав Аллагьас ﷻ хадубцунго рехсана: «ХӀакълъунго, Аллагь вуго ризкъи кьолев, Щулияб Къуваталъул БетӀергьан» («Аз-Зарият» сурат, 58).
Аллагьас ﷻ гьаб бакIалда бичIчIизабулеб буго ризкъи кьолев чи цохIо ТIадегIанав Аллагь ﷻ вукIин.
Гьаб аяталъ бихьизабулеб буго лагъзадерие ризкъи букIин ва гьединго тIадаблъун гьабуна гьезда лъазе кколеблъи ризкъи кьолев чи Аллагь ﷻ гурев цогидав гьечIевлъи.
Бухари ва Муслимица бицараб хIадисалда буго: «Цо къоялъ радал Авараг ﷺ къаси бараб цIадалдаса хадуб къватӀиве вахъуна ва абуна: «Лъалищ нужеда БетӀергьанас щиб абурабали?». Нижеца жаваб гьабуна: «Аллагьасдаги ﷻ ва Гьесул Аварагасдаги ﷺ цIикIкIун лъала», - ян. Аварагас ﷺ абуна: «Нужер БетIергьанас абула: «Дир лагъзадерида гьоркьоса гьаб сордоялъ иман лъуралги лъечIел рахъана. Жидеца гьаб цIад Аллагьасул ﷻ рахIматалдалъун бачIараб бугин абурал ккана Дида иман лъурал ва цIвабзазда божичIел. Амма цIад кинаб букIаниги цIва сабаблъун рещтIараб бугин абурал Дида иман лъечIеллъун ккана, цIвабзазда иман лъурал руго», - ян.
Гьаб хIадисалъ бихьизабуна хIакъикъияв ризкъи кьолев Аллагь ﷻ вукIин.
