Баракатаб гIуж
Байгьакъияс рехсон буго Аварагасул ﷺ яс ПатIиматица бицанин: «Цо нухалъ рогьалил гIужалъ дун егизе яхана (гьеб букIун буго рогьалил какдаса хадуб, бакъ баккизегIанго заман). Гьеб гIужалъ нижехъе вачIана Бичасул авараг ﷺ ва жиндир хIетIеялдалъун дидаги цун, гьес ﷺ абуна: «Дир яс! ТIаде яхъа ва хIадурлъун йикIа ТIадегIанав Аллагьасул ﷻ ризкъи рещтIиналъе, мун тасамахIайлъун йикIунге! Аллагьас ﷻ гIадамазе ризкъи биччала рогьел рещтIаралдаса бакъ баккизегIан», - абун.
ГIаишатица бицараб хIадисалдаги буго Аварагас ﷺ абунин: «Нужеца Аллагьасда ﷻ ризкъи радал гьаре, гьеб гIуж буго баракатаб ва мурадал анищазде щолеб (дугIа къабул гьабулеб абураб магIна)», - ян.
Цояв вачIун вуго Ибрагьим ибну Адгьамихъе ва лъугьун вуго гьевгун къацандизе баракат абураб жо дида бичIчIуларин ва гьечIин гьединаб жойин абун. Ибрагьимица гьесда цIехола: «Дуда бихьанищ гьой ва чахъу?» - абун. Гьес жаваб гьабула рихьанин. Нахъеги Ибрагьимица цIехола: «Киназ тIанчIи гIемер гьарурел ва киналъул наслаби гIемер тIиритIулел?» - абун. ДагIбадулас жаваб гьабула: «Гьвеялъ гьабула анлъго-анкьго тIинчI, чахъуялда абуни къанагIат гурони лъабгоялдаса цIикIкIун гьабизе кIоларо», - ян. Цинги Ибрагьимица абула: «ЛъикIго валагье сверухъе ва хал-шал гьабун бихье кина гIемер ругелали», - абун. Жаваб гьабун гьес абула гIи гIемер бугин абун. Ибрагьимица нахъеги абула: «Чахъаби гьанай хъола, амма гьезул къадар кинго дагьлъуларо», - ян. ДагIбадулав гьелъие мукIурлъула. Цинги Ибрагьимица абула: «Гьеб жо буго доб баракат», - ин. Ибрагьимица рехсараб мисал гIемер бичIчIичIого гьес нахъеги цIехола: «Щайха гIияда гьеб (баракат) бугеб, гьазбазда гьечIеб?» - абун. Жаваб гьабун Ибрагьимица абула: «Щайгурого чахъаби сардил авалалда кьижула ва рогьалилъ тIадеги рахъуна. Аллагьасул ﷻ баракат-рахIматал рещтIунеб гIуж рорчIун рукIун тIобитIула ва гьезде баркат-рахIматги рещтIуна. Гьаби абуни, тIубараб сордоялъ хIапдола, доре-гьанире рекерахъдула ва рогьел баккулеб гIужалъ кьижула. Аллагьасул ﷻ баракатгун рахIматал рещтIунеб гIуж гьез кьижун инабула ва баркат-рахIматалдасаги махIрумлъула», - ян.
Жиндир къо баракатаблъун букIине бокьарав чиясе рекъараб буго радал хехго тIаде вахъине ва гьарулел ишалги гьеб гIужалдаса байбихьизе.
Ибну Мажагьица рехсолеб буго рогьалил гIужалда хурхун Аварагас ﷺ гьабураб дугIа: «Я Аллагь ﷻ, Дуца дир умматалда баракат лъе рогьалил гIужалда», - ян.
