ЦIуни
Рокъоса къватIире рахъунеб мехалъ, ТIадегIанав Аллагь ﷻ ракIалде щвезавун, хасал дугIаби ва азкарал цIализе рекъараб буго бусурбанчиясе. Гьедин гьабиялдалъун ТIадегIанав Аллагьас ﷻ цIунила кинабго заралалдаса, шайтIаналъул макру-хIиллаялдаса ва нилъее зарал гьабизе бокьараздасаги рикIкIад гьарила. ГIемер батIи-батIиял дугIаби ва тасбихIал руго зарал бугелдаса цIунизе сабабазе.
Анас-асхIабасдаса бицун буго, Аллагьасул расулас ﷺ абунин: «Щив чи вугониги жиндир рокъоса къватIиве вахъунаго «Бисмиллагьи таваккалту гIала Ллагьи ва ла хIавла ва ла къуввата илла би Ллагь» абун, гьев чиясда абула (яги Аллагьас ялъуни малаикзабаз): «Дуе гIей гьабила, мун цIунила ва тIовитIизеги тIовитIила абун, шайтIанги гьесдаса рикIкIалъила», - ян. (Тирмизи).
Гьеб хIадисалъул Абу Давудица бачараб риваяталда буго: «Ва (цо шайтIаналъ) цогидалда абула: «Кин (дуда) кIолеб (дуе хIажаталде щвезе) битIараб нухда ва цIуниялда вугев чиясдасан?» - абун.
Гьел рагIабиги абун рокъоса вахъарав чи хвасарлъаравлъун вукIина гьесие зарал гьабизе рес бугелщиналдаса ва Аллагьасул ﷻ цIуниялда гъоркьги хутIила.
Гьединго Абу Гьурайратидасан бицун буго: «Жиндирго рокъоса къватIиве вахъунелъул Бичасул Аварагас ﷺ кидаго абулаан: «Бисмиллагь, аттуклану гIала Ллагь ва ла хIавла вала къуввата илла би Ллагь», - ин. (Бухари)
ГIабдуллагь ибну ХIубайбица бицун буго: «Цо нухалъ цIад балеб ва цIакъ бецIаб сордоялъ ниж ана Аллагьасул ﷻ Аварагасухъе ﷺ, нижеда цадахъ дугIа гьабизе, как базе. Нижеда гьев рокъовги ватана. Гьес нижеда абуна: «ЦIале», - абун. Амма дица щибго цIаличIо. Бичасул Расулас ﷺ нахъеги абуна: «ЦIале», - абун. Дица щибго цIаличIо. Лъабабизеги абуна Аварагас ﷺ: «ЦIале», - абун. Гьеб мехалъ дица цIехана: «Я, Аллагьасул Расул ﷺ, щиб дица цIалилеб?» - абун. Гьес ﷺ абуна: «Лъабго нухалъ радалги къасиги цIале «Ал-Ихлас», «Ал-Фалакъ» ва «Ан-Нас» сураби, гьел гIела дуе мун кинабго квешлъиялдаса рикIкIад гьавизе», - ян. (Абу Давуд)
Гьединго, къватIире рахъиндал цIунизелъун цIализе хириял руго Къуръаналдаса цо-цо аяталги, гьединаздасан ккола: «Ал-Ихлас», «Ал-Фалакъ» «Ан-Нас», «Залзалат» Аятул Курси гIадал машгьурал аятал, муридзабазе цIакъго беццараб буго имам Нававиясул хIизбу цIализеги.
ЦIаларалъул божилъиялда рукIин гуребги, жинцагоги хIаракат бахъизе ккола хIарамалда гъорлъе ккезе чIунгутIизе, ТIадегIанав Аллагь ﷻ даимго ракIалда чIезавизе, лъикIал ишазулъ гIахьаллъизе.
Аллагьас ﷻ цIунаги! Амин!
