Рамазаналда хаслъараб
Рамазаналда хаслъараб
Рамазан моцIалъ гьарулел гIамалазул цояб ккола таравихIазул какал рай. Гьел руго жал раялде кIвар кьезе кколел суннатул муакадал абулел какал. Гьезул гIуж щола боголил как бан хадуб, рогьалил какде щвезегIан.
Гьел руго кIи-кIи ракагIатккун разе рихьизарурал, 20 ракагIаталъул какал. Мажгитазда, жамагIатги бакIарун балелъул, гIадат билълъараб буго 8 ракагIат таравихIалъулги хадуб лъабго ракагIат витруялъулги балеб.
ТаравихIазул какал разе байбихьула имамас: «Ассалата жáмигIат» абиялдалъун. Имамас гьедин абун хадуб киназго цадахъ абула: «Лá хIавла ва лá къуввата иллá биллагь. Аллáгьумма салли гIалá МухIаммадин ва гIалá áли МухIаммадин ва саллим. Аллáгьума иннá насъалукал жанната ва нагIýзубика мина ннáр», - абун. Гьединги абун рахъуна тIоцебесеб кIиго ракагIат базе. Какие ният гьабула: «Дица ният гьабуна таравихIазул суннатаб как базе, имамасда хадуб», - абун.
Гьединаб хIалалда гьабула тIоцебесеб, лъабабилеб, щуабилеб, анкьабилеб ва ичIабилеб как бан хадубги.
КIиабилеб, ункъабилеб, анлъабилеб, микьабилеб ва анцIабилеб как бан хадуб киназго цадахъ лъаб-лъаб нухалъ абула: «СубхIáна ллáгьи вал хIамду лиллáгьи ва лá илáгьа илла ллáгьу ва ллáгьу акбар. СубхIáна ллáгьи гIадада халкъигьú ва ризáа нафсигьú ва зината гIаршигьú ва мидáда калиматúгьи», - абун. Гьедин лъабго нухалъ абидал имамас абула «Ассалата жáмигIат» - абун, цинги киназго цадахъ такрар гьабула тIоцере рехсарал азкарал: «Ла хIавла ва ла къуввата илла биллагь…», - абун ахиралде щвезегIан.
ТаравихIал ран лъугIидал хадур рала витруялъул ракагIаталги. Цинги киназго абула «СубхIáнал маликил къуддýс», «СубхIанá ллáгьил маликил къуддýс» ва «СуббýхIун къуддýс Раббул малáикати ва ррýхI. СубхIáна ман тIагIаззаза бил къудрати вал бакъáъ ва къагьгьарал гIибáда бил мавти вал фанáнъ. СубхIáна раббика раббил гIиззати гIаммá ясифýн ва салáмун гIалал мурсалúна вал хIамду лиллáгьи раббил гIаламин», - абун.
Ахиралда: «Аллагьумма инни агIузу биризака мин сахатIика ва бимугIафатика мин гIукъубатика ва бика минка ла ухIси санаан гIалайка анта кама аснайта гIала нафсика», - абураб дугIаги цIалула.
Аллагьас ﷻ тавпикъ гьабеги хирияб заман гIадада биччангутIизе!
