Авараг макьилъ вихьулищ?
Авараг макьилъ вихьулищ?
Инсанасда рихьула батIи-батIиял макьаби. Хасго ракI бохизабулеллъун рукIуна рокьулел чагIи, гIага-божарал ялъуни вализабигун шайихзаби рихьани. Амма бищун лъикIаб, щивасул жиб бихьиялде хьулги букIунебин абуни ккола халкъалъул хирияв МухIаммад авараг ﷺ макьилъ вихьи.
ГIалимзабаз абун буго гьединаб макьу бихьи букIунин чиясулъ иман букIиналъул гIаламат ва холелъулги исламалда рухI босиялъе хIужа.
Аллагьасул расулас ﷺ абун буго: «Щив чи вугониги дун макьилъ вихьун, гьес халгьабе дун r унго-унгоги вихьарав гIадин. Щайин абуни, шайтIаналда (иблис) кIоларо дир сипат гьабизе», - ян. Гьединго аварагас ﷺ абун буго: «Дун макьилъ вихьарав чи киданиги жужахIалде кколаро», - ян.
Ибну ХIажарица «СахIихIул Бухариялда» тIад гьабураб жиндир тIехьалда, «Дун макьилъ вихьарав щив чи вугони, гьесда дун унго-унгоги вихьила», - ян абураб хIадисалъе рехсолел руго батIи-батIиял пикраби. Амма бищун хIакъаб, бичIчIизе кколеб пикру бугин рехсолеб буго, «Кинаб сипаталда авараг вихьаниги, гьеб битIараб буго. Гьеб макьуги Аллагьасдасан буго», - ян. Гьеб пикру битIараб бугин абураздасан вуго Къази Абу-Бакр ТIайиб гIадал бергьарал гIалимзабиги.
Авараг ﷺ макьилъ вихьула ракIбацIцIадав, мунагьлъун лъугьине бегьулел гIадал пикраби ботIролъего рачIунарев ва гьел гIамалал гьаруларев чиясда. Авараг ﷺ макьилъ вихьи мурадлъун кквеялдаса лъикIаб буго сундулъго гьесда ﷺ нахърилъине ва гьес r динлъун тараб Исламияб шаригIат цIунизе цIакъ бахъизе. Гьесдехун ﷺ рокьи бижизабулеб ва гьес r таралда гIамал гьабизе кумек гьабулелдасан буго гIемер салават битIиги. Аварагасде ﷺ салават битIиялдалъун нилъеде БетIергьанасул ﷻ амруги буго. Живго аварагасги r абун буго: «Даражаялъул рахъалъ диде ﷺ цIикIкIун гIагарал нужер гIемер салават битIулел руго», - ян (Тирмизи).
Инсанасул тIабигIат буго жинца гIемер гьабулеб жо макьилъ бихьулеб. Гьединлъидал, къойида жаниб чиясул рекIелъ аварагасдехун ﷺ рокьи, бухьен ва гьесде ﷺ салават гIемер битIи бугони, макьилъ гьев вихьиялдеги кIудияб хьул буго. Аллагьас ﷻ насиб гьабеги щивасе гьесдехун ﷺ рокьи ва гIемер макьилъ цеве вачIин! Амин!
МУХIАММАДГIАРИФ КЪУРБАНОВ
