Кин тIоритIилел хириял къоял?
Кин тIоритIилел хириял къоял?
Къурбаналъул къо ккола лъагIалида жанир ругел хириял гIужазул цояб. Гьебги ккола бусурбабазул бищун кIудияб байрам. Гьеб къоялъ бусурбабаз Аллагьасе ﷻ бугеб мутIигIлъи загьир гьабун къурбанал хъола, садакъа гьабула, ресалда ругез паризаяб хIеж борхула.
ЗулхIижа моцI буго муъминзабазе Аллагьасул ﷻ рахъалдасан бугеб цIоб, лъикIал гIамалал гьариялъе кьолеб рес. Ибну ГIаббасица бицун буго аварагас ﷺ абунин: «ЗулхIижа моцIалъул тIоцебесеб анцIго къоялъ гьабураб гIамал гIадаб жо гьечIо», - ян. (Бухари)
ТIоцебесеб 10 къоялъ гьаризе рекъарал гIамалаздасан ккола: цере гьарурал мунагьаздаса тавбу гьаби; ахираталъе пайдаял гIамалал гьари; инсанасул рижи загIипаб бугелъул, гьабулеб гIамал, дагьаб бугониги, ният халгьабунгIаги Аллагьас ﷻ къабул гьабиялде хьул букIин; лъикIал гIамалаз БетIергьанасде ﷻ гIагар гьарулел кинниги, квешаз Гьесдаса ﷻ рикIкIад гьарулелъул, мунагьазде кколеб гIамал гьабунгутIизе жигар бахъи; суннатаб кIал кквей. Гьел къояз кIал кквеялъул хиралъиялъулъ бицун аварагас ﷺ абун буго: «Гьел къоязулъ кIал кквей буго бищун лъикIал гIамалазул цояб…», - ан (Муслим). ГIарафа къоялъ кIал кквей аварагас ﷺ цIакъго-цIакъ тIадегIан гьабуна: «Аллагьасе ﷻ гIоло гIарафа къоялъ кIал кквей БетIергьанас ﷻ гьабулеб буго араб соналъулги хадусеб соналъулги мунагьал чурилъун», - ан (Муслим). Какал жамагIаталда раялда тIад чIей гьаби, такбир, тагьлил, тахIмид гIемер бачин, садакъа хайрат гьаби гIадал цогидалги Аллагьасде ﷻ гIагар гьарулел суннатал гIамалазде кIвар кьей.
«ЗулхIижа моцIалъул 10-абилеб къо ккола къурбан хъвеялъул байрам. Гьеб къо БетIергьанасда ﷻ цебе бищун лъикIабги буго» (Абу Давуд).
Аллагьас ﷻ тавпикъ гьабеги!
