Авараг ﷺ вакъун щай чIолев вукIарав?
Авараг ﷺ вакъун щай чIолев вукIарав?
Авараг ﷺ ва гьесул агьлу ракъун рукIунаанин абун гIемер рехсола. Щайха асхIабзабаз Авараг ﷺ ва гьесул хъизам ракъизе толел рукIарал?
ГIалимзабаз хъвалеб буго, Аварагги ﷺ асхIабазабиги магIишат гьечIого рукIинчIин абун. ГIемерисеб мехалъ гьез жидерго боцIи-мал, агьлуялъе къваригIарабги тун, кьолеб букIана мискинал гIадамазе. Нилъеда лъала Авараг ﷺ, кодоб бугеб жо бикьун лъугIизабун гурони, кьижизе унароан. Авараг ﷺ гIорцIизегIан кваналароан. Щайгурелъул, гIорцIараб мехалда гIибадат гьабизе захIмалъулеб букIун.
Цоги, хъвалеб буго тIоцебе Авараг ﷺ накълулъун хадуб баккараб бидгIа квен гIемер кванай букIанин абунги.
Аллагьасул расулас ﷺ жиндирго ахIвал-хIал (вакъун вукIин) асхIабзабаздаса бахчулеб букIана. АсхIабзабазда гьеб лъалеб букIарабани, сундухъго балагьичIого, гьез кумек гьабилаан. Гьединго Аварагас ﷺ нилъеда малъана гьардей лъикIаб жо гуреблъиги.
ГIалимзабаз хъвалеб буго мискинлъи Аварагас ﷺ жиндиего бокьун тIаса бищараб букIанин абунги. Гьесда лъицаниги, хIатта БетIергьан Аллагьасцин, абичIо мискинлъи тIаса бищеян. Аварагасухъе ﷺ малаик витIула меседил мугIрул дуда цадахъ рилълъине гьарилищинги абун. Гьесда абула, бокьани ханлъун вукIайин, бокьани лагълъун вукIайин абун. Хирияв Аллагьасул расулас ﷺ тIаса бищула авараг-лагълъун вукIине. Аллагьасда аскIоб бищун кIудияб макъам Аллагьасул ﷻ хIакъикъияв лагълъун вукIин буго. Гьесда лъалеб букIана лагълъи тIаса бищаниги Аллагьас ﷻ кIиябго, ай авараглъиги бечелъиги кьезе бугеблъи. Гьелъин Сулайман аварагасги тIаса бищараб гIелму, бечелъиялдасаги мулкалдасаги. Хадуб Аллагьас ﷻ Сулайман аварагасе кинабго кьуна. ГIелму кколелъулха бечелъи ва къуват.
Бечедал асхIабзабицин рукIана ракъун чIолел. Мисалалъе, ГIусман-асхIаб. Гьезги Аллагьасул нухда гIемерисеб жо кьезе хIаракат бахъулаан. Абубакар-асхIабас кинабго Аллагьасул нухда хвезабулеб букIана. Гьевги вукIунаан вакъун, цо-кIиго ретIел ретIине жо гурони гьечIого. Гьелъул магIна ккола, гьезул рекIелъ тIоцебе дин букIанин абураб, дунял гьез малъи гьабулеб букIинчIо.
