Бухьен къотIизе тоге
Макьу ккола хIухьбахъи гьаби гуребги, инсан загIипавлъун лъугьунеб хасаб хIалги. Исламалъ гьеб лахIзаталдеги кIвар кьола. МухIаммад аварагас ﷺ малъана Аллагьасул ﷻ цIуни ва баракат щвезелъун кколеб къагIидаялъ кьижизе хIадурлъизе кколеб куц.
Бараъ ибн ГIазибидаса бачIараб хIадисалда буго: «Мун кьижизе хIадурараб мехалда какие чури гьабе, цинги кваранаб рахъалдаги вегун абе:
اللَّهُمَّ أَسْلَمْتُ نَفْسِي إِلَيْكَ، وَفَوَّضْتُ أَمْرِي إِلَيْكَ، وَأَلْجَأْتُ ظَهْرِي إِلَيْكَ، رَغْبَةً وَرَهْبَةً إِلَيْكَ، لَا مَلْجَأَ وَلَا مَنْجَا مِنْكَ إِلَّا إِلَيْكَ، آمَنْتُ بِكِتَابِكَ الَّذِي أَنْزَلْتَ، وَنَبِيِّكَ الَّذِي أَرْسَلْتَ
МагIна: Я Аллагь ﷻ, Дуе мутIигIлъула дун, Дирго ишалги Дуде божун тола, хьулгун, хIинкъигун Дуде вуссуна. Дудаса лъутизе бакIги хвасарлъиги Дудасан гурони гьечIо. Дун божана Дуца рещтIараб ТIехьалдаги, Дуца витIарав Аварагасдаги ﷺ.
Гьеб сордоялъ хвани, хола Аллагь ﷻ цо гьавиялъул нияталда».
Кьижилалде какие чури ккола чорхое гьабулеб рацIцIалъи гуребги, рухIияб хIадурлъиги. Макьу ккола гьитIинабго хвел гIадаб жо. Кваранаб хьибилалда кьижи суннатабги сахлъиялъе пайдаябги буго. ДугIаялъ загьир гьабула Аллагьасда ﷻ тIубанго божи гьаби, Гьес ﷻ гурони цIуни кьолеб гьечIолъиялда мукIурлъи, кьижилалде цебе иман тасдикъ гьаби. Гьеб дугIаги гьабун кьижани ва ворчIичIони, чи иманалда хола. Гьеб кIудияб рахIмат буго.
Кьижилалде цебе дугIа гьаби ккола хвел ракIалде щвезабиги. Аварагас ﷺ нилъеда малъана кьижилалде цебе гьабураб калам гIумруялда жаниб ахирисеб каламлъун букIине бегьулеблъи. Къуръаналда буго (магIна): «Нужеца Дун рехсе Дие тIагIатгун гIибадат гьабун, Дир амру-нагью тIубан, Дица ﷻ нужги рехсела гIемераб кири гьабун, нужер мунагьал чурун» (сура «Ал-Бакъарат», аят 152).
Гьел рагIаби ккола Аллагьасулгун ﷻ нилъер бухьен кидаго букIине кколеблъи ракIалде щвезабулеблъун, ай кьижулагоги, рахъунагоги, тIубараб гIумруялъги ва хвалда цебеги.
