Аварагасул ﷺ цIарал
Аварагасул ﷺ цIарал
ТIадегIанав Аллагьас ﷻ хирияв аварагасе ﷺ кьун руго гIемерал цIарал. Гьезул цоял рехсон руго Къуръаналда, цогидазул бицен букIана цере рукIарал аварагзабазде рещтIарал тIахьазулъ. Гьединго рукIана гьел аварагзабазда БетIергьанас ﷻ малъун, гьез рехсаралги хириясул ﷺ цIарал.
Аварагасул ﷺ цIаралдасан ккола «МахIмуд» абурабги. Гьелъул магIна буго «Жиндие рецц гьабурав» абураб. Гьеб цIар буго БетIергьанасул ﷻ «ХIамид» абураб цIаралда релълъараб. Гьелъул магIна бугелъул жиндие рецц гьабулевин абураб. МахIмудилан цIар тун букIана аварагасда ﷺ Давуд аварагасул Забуралда.
Цоги цIаралдасан буго «ал-ФатихI». Гьелъул магIна ккола «Жинца рагьулев» абураб. Гьеб цIар аварагасда ﷺ тун буго, гьев ﷺ сабаблъунги гьавун БетIергьанас ﷻ битIараб нухалъул нуцIа рагьиялъе гIоло. Аллагьас ﷻ гьев ﷺ гьоркьов ккун гIемерал чагIазул беццал берал хIакъалде ралагьизаруна, гIинкъазул гIундул хIакъикъияб калам рагIулеллъун гьаруна, куфруялъул гъат тIад лъугьун рукIаразул ракIал нуралъул нухде рачана, алжаналъул каваби, гIелму-гIамалалъул нухал рагьана, дунял-ахираталъул талихIалги рикьана.
Буго «ал-ХIашир» абураб цIарги. Гьелъул магIна ккола «Жинца данде гьарулев» абураб.
«Ал-ГIакъиб». Гьаб цIаралъул магIна ккола «Ахиралда, хадув вачIарав» абураб. Нилъер авараг ﷺ ккола ахирисев, жинда хадув цоги авараг вахъине гьечIев. Гьелъие гIоло абураб буго ГIакъибиланги.
Гьесул ﷺ цIараздасан буго «ал-Мукъафи» абурабги. Гьелъул магIнаги, ГIакъиб абураб цIаралдаго релълъун, киналго аварагзабазул лъалкIда хадув вачIарав, гьезго ккураб бацIцIадаб Аллагьасул ﷻ нухда вилъунев абураб.
Буго «ал-Аввалу» абурабги цIар. Гьелъул магIна буго «Авалияв, тIоцевесев» абураб. Гьеб цIар аварагасда ﷺ абун буго вижиялъулъ жив тIоцевесев вукIиналъе гIоло. Черхалъул рахъалъ тIоцеве вижарав инсан Адам авараг вугониги, рухIалъул рахъалъ тIоцеве вижарав МухIаммад авараг ﷺ ккола. Гьединго МухIаммад ﷺ ккола Къиямасеб къоялъ тIоцеве тIаде вахъунев, жинца шафагIат гьабизе байбихьулезулги тIоцевесев, азалалда заррабилъун гIадамал ругеб мехалъго Аллагь ﷻ БетIергьанлъун вукIиналъе мукIурлъун жаваб гьабуразул тIоцевесевги.
«Ал-Ахиру». Гьаб цIаралъулмагIна ккола «Ахирисев» абураб. Гьедин абиялъе магIнаги ккола жив ﷺ ахирисев авараглъун витIарав вукIиналъе гIоло.
Аллагьас ﷻ нилъ гьареги гьесул ﷺ хириял цIарал лъалездасан ва Къиямасеб къоялъ шафагIат насибаздасан! Амин!
