Унти – рахIмат
Инсанасде рачIунел унтаби ва балагьал Аллагьасул рахъалдасан гьесие ругел хIалбихьиял ккола. Кин гьел къварилъаби раччаралали балагьун, гьелда бан букIуна Ахираталда гьелъухъ щолеб ажру-кириги. Ажру-киригун цадахъ муъминчиясе тIаде рачIарал балагьазде сабру гьабиялдалъун Аллагьасул ﷻ рахъалдасан мунагьал чуриги букIуна. Гьедин халгьабидал, унти инсанасе Аллагьасул ﷻ салам ва рахIмат ккола.
ТIаде бачIараб унти захIматаб бугебгIан гьелъухъ щолеб кириги мунагьал чуриги кIудияб букIуна. Гьелдаго цадахъ, ТIадегIанас ﷻ унти тIаде тIамидал, гьелъие дару балагьизе бихьизабуна. Аллагьас ﷻ щибаб унтуда цадахъ гьелъие даруги бижана.
Абу Усама ибн Шарикидасан бицана хирияв Аварагас ﷺ абунин: «Нужеца дару гьабе, Аллагьасул лагъзал. ТIадегIанав Аллагьас ﷻ хвел тун батIияб унти рещтIинчIо дару гьечIеб», - илан. (Ибн Мажагь, Тирмизи, ибн ХIиббан)
Унти тIаса инарулел сабабазул цояб ккола дугIа гьаби. ТIадегIанав Аллагьас ﷻ амру гьабулеб бугелъул нужеца гьареян ва Жинца ﷻ жаваб кьелин абун.
Хирияв Аварагас ﷺ унти тIаде бачIиндал цIалулел рукIана гьал дугIаби:
«Аллагьумма азгьибил баъса раббаннаси ва шфи фа анта Щафи ла шифаа илла шифаука шифаан ла югъадиру сакъама». (МагIна): я дир Аллагь, унти нахъе босе ва сахлъиги кье. Мун вуго сахлъи кьолевги сахлъи гьабиги гьечIо Дудасан ﷻ гурони. Киналниги унтабаздаса сахлъи кьейин абун Дуда гьарулеб буго нижеца.
Унтараб бакIалда кверги лъун, гьаб дугIаги цIализе лъикIаб буго:
«Бисмиллагьи агIузу биГIиззатиЛлагьи ва Къудратигьи мин шарри ма ажиду ва ухIазиру».
(МагIна): Аллагьасул ﷻ цIаралдалъун байбихьула, Алагьасул ﷻ ТIадегIанлъиялдалъун ва ХIалкIвеялдалъун цIуни гьарула дида батараб ва хъантIараб квешлъиялдаса.
Унтарасде тIаде индал гьаб дугIа цIалила:
«Бисмиллагьи аркъика мин кулли шайин юъзика мин шарри кулли нафсин ва гIайнин ва хIасидин. Аллагьумма яшфика бисмиллагьи аркъика».
(МагIна): Аллагьасул ﷻ цIаралдалъун цIуни гьарула зарал гьабулебщиналдаса. Нафсалъулъ, берзул ва хIасадалъул кинабниги заралалдасаги цIуни гьарула.
Гьелдаго цадахъ Аварагас ﷺ унтаразда абулаан сахазеги дугIа гьабеян абун. Унтаразул дугIа къабулаб букIунелъул.
