ХIедул чирахъалъул мисал
ХIедул чирахъалъул мисал
Цо нухалда эменги васги, гамида рекIун рукIаго, нухги къосун пуланаб чIинкIиллъиялде ккун руго. Гьенире щведал гьезда бихьула жидерго гамил тIину багьун букIин. Кумек тIалаб гьабун, инсуцаги васасги хIукму гьабула, рахъ-рахъалде ине.
Гьедин иналде инсуца васасда абула: «Нилъеца Аллагьасда кумек гьаризе ккола», - ян. Цинги уна рахъ-рахъалде. Васас байбихьула Аллагьасда ﷻ гьаризе: «Я, Аллагь ﷻ, дун вакъуца хвеларедухъ гьаб рохьоб кваназе жо бижизабе», - ян. Аллагьас ﷻ гьесул дугIаялъе жаваб гьабун, пихъил гъутIби рижула. ГIорцIизегIанги кванан, васас жеги гьарула: «Я, Аллагь, къаси сордо базе бакI гьечIо дир. Гьарула Дуда ﷻ цо рукъ кье дие», - ян. Цеве унаго цо рукъалде тIаде ккола гьев ва гьесда бичIчIула Аллагьас ﷻ дугIаялъе жаваб гьабулеб букIин. Цинги гьесда ракIалде ккола тIадвуссине ва Аллагьасда ﷻ цIияб гама гьаризе. Аллагьас ﷻ гьеб дугIаялъеги жаваб гьабула. Васас, цIияб гамидаги рекIун, гьениса нахъе ине хивал гьабула. Гьеб мехалъ зодисан цо гьаракь кIалъала: «Ле, гIадан, мунго цохIойищ инехъин вугев? Эменги вачинарищ цадахъ?» - илан. Васас жаваб гьабула: «Гьесги дугIа гьабизе кколаан, амма Дуца ﷻ гьесие жаваб гьабун гьечIеблъи бихьулеб буго. Дида ккола гьесул ракI тIубанго бацIцIад гьечIолъиялъул хIасил гьеб бугин. РакI бацIцIалъизегIан гьанивго тела гьев», - илан. Цинги гьебго гьаракьалъ абула: «Дуда лъалищ гьабгощинаб мехалъ дур инсуца щиб гьарулеб букIарабали», - илан. Лъаларин абула васас.
Гьаракьалъ абула: «Дур инсуца цого дугIа букIана гьабулеб. Гьес гьарулеб букIана: «Я, Аллагь, гьав дир васас щиб гьараниги Дуца ﷻ кьейилан», - ян. Гьединлъидал, дуе щаварабщинаб жо гьесул дугIаялъул хIасил буго», - ян.
Гьаб къисаялдасан бичIчIулеб буго эбел-инсул лъималаздехун унго-унгояб рокьи букIунеблъи. КигIан захIматабги иш тIаде бачIиндал, инсуца васасул хIажатал жиндиралдасаго цере гьарула. Эбел-инсул мисал буго хIедул чирахъалъул. Сверухъ ругезе канлъи гьабун, хIедул чирахъ бухIун лъугIулебго гIадин, эбел-инсуцаги лъималазул иш лъикI ккеялъе гIоло гIумру кьола.
Аллагьас ﷻ сахлъи кьеги нилъер умумузе. Амин!
