Аварагасул ﷺ вижи
Аварагасул ﷺ вижи
Чанго соналъ Аварагасе ﷺ хъулухъ гьабурав Анас ибну Малик-асхIабас бицана: «Авараг цIакъго халатав ва цIакъго къокъав вукIинчIо, цIакъго хъахIав ва чIегIеркIкIуяв вукIинчIо, гьесул расал кIургIарал ва цIакъго ритIарал рукIинчIо. ТIадегIанав Аллагьас ﷻ гьев авараглъун витIана 40 сон бараб мехалъ. Маккаялда гьес бана 10 сон ва Мадинаялда бана 10 сон. Лъабкъоялда анцIил бетIералда Аварагасул ﷺ рухI босана. Гьеб заманалда ботIрода ва магжида 20-гIанасеб хъахIаб рас букIинчIо», - ян. (Тирмизи).
Цогидаб риваяталда буго Авараг ﷺ Маккаялда 13 соналъ вукIанин авараглъи кьун хадуб. Гьеб риваятги бергьараб буго. Авараг ﷺ чан сон бараб мехалда накълулъаравин абураб суалалда тIасан гIалимзабазул хилаф буго. Бищун кьучIаб ва машгьураб буго 63 сон бараб мехалъ накълулъанин абураб рагIи.
Авараг ﷺ халатав ва къокъав вукIинчIо. Щайгурелъул, цIакъго халалъи ва къокълъи гIайиблъун рикIкIуна. Авараг ﷺ дагьавго халалъиялде гьетIарав вукIана. Авараг ﷺ гIадамалгун гIодов чIедал, гьесухъ балагьаразда кколаан гьев ﷺ ворхатав чи вугин абун.
Авараг ﷺ хъахIав ва чIегIеркIкIуяв вукIинчIо. Авараг ﷺ вукIана хъахIлъигун дагьаб багIарлъи жубарав. Имам Бажурияс абуна: «Гьаб дунялалда бищун лъикIаб кьер ккола хъахIлъигун багIарлъи жубараб», - ян. Цоги бицана, Авараг ﷺ Майсаратгун цадахъ Хадижатил даран-базар гьабизе Шамалде индал, БахIирада лъанила гьев авараг вукIин, бадиб жубараб багIарлъиялъ. Гьеб кколила авараглъиялъул гIаламат. Киналниги аварагзабазул гьеб гIаламат букIанила.
Аварагасул ﷺ чIегIерал берал рукIана.
Аварагасул ﷺ вижи букIана бищун берцинаб. Юсуф аварагасе кьуна бащдаб берцинлъи, МухIаммад аварагасе ﷺ кьуна кинабниги берцинлъи. Кинниги Аллагьас ﷻ нилъедаса гьеб берцинлъи бахчанила гIакълу ун, кIотун ккечIого рукIинелъун. Нилъер бераз гьеб хIехьезе букIинчIила.
Аварагасул ﷺ бицен гьабулел асхIабзабазул гIемерисел гIолохъанал, гьитIинал рукIана. КIудиял асхIабзабазда Аварагасул ﷺ бадире ралагьизе кIолароан гьесул ﷺ адаб-хIурмат гьабун. ГьитIинал асхIабазаби абуни балагьулаан ва гьедин нилъехъеги щвезабуна Аварагасул ﷺ сипатал.
Авараг ﷺ вилъанхъулаан гIедегIун, тирха-кIичун. АсхIабазабаз абулаан жидеда гьесда хадур гъезе бажарулеб букIинчIин.
