МутагIилзабазухъ ралагье...
ХIурматиял вацал ва яцал. Гьале рииги ана ва хаслихълъиги щвана. ТIаде щвана цIияб цIалул сонги. Эбел-инсуе лъимал рухIгIан рокьулеблъи киназдаго лъала. Гьаб ракьалда бищун талихI бугев инсанги ккола, аварагасул ﷺ суннаталда нахъвилъун, берцинаб тарбия лъимал-хъизамалъе кьурав чи. Эбел-эмен ургъула школа лъугIидал лъимал цIализе киредай кьелелин абураб суалалда тIад. Лъимадул гьунар бихьун цIализеги ритIула. Гьеб кутакалда лъикIги буго. Лъай тIалаб гьаби исламалъги беццула. Амма гьаниб бицине бокьун буго исламияб лъай тIалаб гьабуразе бугеб кири-даражаялъул. Гьаб дунялги цIакъ къокъаб, бер къапилалде жиб тIаса унеб жо бугелъул.
Анас бин Маликидасан бицана, аварагас ﷺ абунин: «ТIадегIанав Аллагьас ﷻ жужахIалдаса хвасар гьарурал рихьизе бокьани, нуж ралагье мутагIилзабазухъ», - ян. Хадубги аварагас ﷺ гьедун абуна: «МухIаммадил нафс кверщаликь бугев АллагьасхIаги, гIалимасул нуцIихъе гIелму тIалаб гьабун арав мутагIалимасе ТIадегIанав Аллагьас ﷻ щибаб гали рикIкIун лъагIалил гIибадат хъвала, щибаб гали рикIкIун Алжаналъуб шагьар бала, ракьалдаса гьев хьвадулаго ракьалъ гьесие мунагьал чури тIалаб гьабула, гьев кьижула ва вахъуна мунагьал чураравлъун», - илан.
ХIасанул Басрияс бицана: «Аллагьасул ﷻ нухда гьабулеб жигьадалдасаги хирияб жо цохIо гIелму тIалаб гьаби гурони дида лъаларо. ГIелмуялъул цо баб лъазелъун рокъоса къватIиве вахъарав инсан малаикзабаз сверун ккола, ракъдаллъиялда ругел хIайваназ ва лъелъ ругел рухIчIаголъабаз гьесие мунагьал чури гьарула. ТIадегIанав Аллагьас ﷻ гьесие 72 сиддикъунасул ажру-кириги хъвала», - ян.
ГIелму бихьинаб жо буго, бихьиназда гурони жиб тIалаб гьабизе бажаруларебин абураб цоги хIадисги буго. Гьединлъидал гIелму тIалаб гьабулеб нухда мутагIалимас гIемерал захIмалъабиги раччизе ккола. Щибго лъазабун бажарулеб гьечIонигицин мутагIалимасе гьелъухъ кири букIуна.
МугIалимасухъе гIелму тIалаб гьабизе арасухъ гьес бицаралдаса щибго жо лъазабизе кIолеб гьечIониги Аллагьас ﷻ гьесие чанго тIокIлъи кьола. МутагIалимасе кири щола, гьесда аскIов вугебгIан мехалъ мунагьаздаса цIунун вукIуна, гьесда аскIоса къватIиве лъугьиндал тIаде рахIмат рещтIуна, мугIалимасде рещтIараб рахIматалъул бутIа гьесиеги щола, гIенеккун вугебгIанасев мехалъ лъикIлъаби гьесие хъвала, малаикзабаз сверун ккола, щибаб гали рикIкIун мунагьал чурула, даража борхула, кири цIикIкIун хъвала. Гьеб кинабго буго дарс лъазабун бажаруларесе бугеб кири. Бажарулесе гьеб чанго нухалъ цIикIкIинабун щола ажру-кири.
