Салават цIализе щай кколеб?
Салават цIализе щай кколеб?
Кинаб хIикмат бугеб ТIадегIанав Аллагьас ﷻ аварагасде ﷺ салават цIализе бихьизабиялъул? Цо-цо гIалимзабаз абуна гIумруялда жаниб цо нухалъ аварагасде ﷺ салават битIизе инсанасда тIадаб бугиланцин.
Салават цIализе бихьизабиялъул хIикмат имам КъустIуланиясги ва гьесул шайих имам Сахавиясги бицана имам Хулаймиясдасан ва ГIизуддин ГIабдусаламидасан: «Нилъеца битIулеб салават аварагасе ﷺ шапагIатлъун гьечIо. Кинниги ТIадегIанав Аллагьас ﷻ нилъеда амру гьабуна лъикIлъи гьабуразе данде лъикIлъи гьабейин абун. Амма нилъехъа гьеб лъикIлъи данде гьабун бажаричIо. Аллагьасда ﷻ лъалелъул нилъеда аварагасе ﷺ лъикIлъи гьабизе бажарулареблъи, гьеб мехалда салават цIализе бихьизабуна», - ян.
Цогидаз абуна: «Иманалъул бищун кIудияб гIаркьел ккола авараг ﷺ вокьун, кIодо гьавун битIулеб салават. Гьелда тIадчIей гьаби ккола аварагасе ﷺ нилъеца гьабулеб щукру. Щукру гьабизе тIалъула гьесдасан ﷺ гIемерал нигIматал нилъее щведал. Кинин абуни, авараг ﷺ сабаблъун нилъ жужахIалдаса хвасарлъана, алжаналде лъугьинарула, талихI щвана гIемер захIмат бихьичIого, щибниги пардав гьечIого тIадегIанал макъамалги щвана», - ян.
Къази ГIиязица бицана Бакр Къушайриясдасан: «Аллагьасдасан ﷻ аварагасде ﷺ бугеб салават ккола хира гьавиялъулги кIодо гьавиялъулги мурад. Нилъеца цебе бицун букIана салаваталъулги саламалъулги магIна. Авараг хутIун цогидазде Аллагьасул ﷻ салават ккола рахIматлъун», - ян.
Аварагас ﷺ салават цIалиялде нилъ гьесизаруна умматалда гурхIун, нилъ Аллагьасде ﷻ гIагарлъизелъун. Гьеб гIагарлъи салаваталда жаниб цIакъ гIемер буго. Мисалалъе, Аллагьасде ﷻ иман цIигьаби ва Гьесул ﷻ авараг ﷺ кIодо гьави. Гьесие къадру-къимат тIалаб гьаби. Ахираталда иман цIигьаби, хасго гьениб лъазе буго аварагасул ﷺ къадру ва тIадегIанлъи. Салаваталда рехсола аварагасул ﷺ агьлу ва асхIабзаби. ЛъикIал чагIазул цIар рехсолеб бакIалда ТIадегIанав Аллагьасул ﷻ рахIматал рещтIуна. Гьездехун рокьиги загьир гьабула. Кинабго амру Аллагьасухъ ﷻ букIиналда нилъ мукIурлъула ва хIелула. Авараг ﷺ тIадегIанав макъамалъул вугониги, гьесде цониги чи вахичIониги, гьев ккола Аллагьасул ﷻ лагъ, живги Гьесул ﷻ рахIму-цIобалде хIажатав.
