Берцинал рагIаби
Берцинал рагIаби
Шайих МухIаммад Рагъиб ТIабах ккола машгьурав тарихчи. Гьев гьавуна 1370 соналда, ХIалабалда. Гьес «Ас-Сакъафатул исламияту» абураб тIехьалда хъван буго: «Суфизм бугелъул нафсал къачIаялдаги хасиятал рацIцIад гьариялдаги абулеб жо, гьеб ккола цIакъго берцинаб нух», - абун.
МухIаммад Садикъ ГIуржун абурав профессорас «Ат-тасаввуфу фил ислам» абураб тIехьалда хъван буго: «Исламалда жаниб тасаввуф ккола дунялалъул букIа, диналъул букIа, ай киналго ишазулъ Аллагьасе ﷻ ракIбацIцIадго гIибадат гьабиялъул аслуялда тIад хIалтIулеб нух», - абун.
Анвар Жунди абурав профессорас «ГIаламиятул Ислам» абураб тIехьалда хъван буго: «Щибго щаклъи гьечIо суфизмалдаса бичIчIулеб жо, гьелъул хIасил исламалдалъун бачIараб букIиналда. Гьеб ккола дунялияб мурадги халгьабичIого, гIибадатги напсалъулгун жигьадги гьаби», - абун.
Абу-Наср Мубашшир ТIиразияв абун вукIана Туркестаналъул гIалимзабазул цояв. Гьес хъван буго: «Исламалъул тIоцересел къояздаса байбихьун цо бусурбабазул хасаб къокъа нахъбилълъана Аварагасул ﷺ суннаталда, Аллагь ﷻ рехсей тIаса бищиялда. Цинги гьел исламияб тарихалда хIакъал муъминзабилъун машгьурлъана, Аллагьасда ﷻ аскIор макъамаздеги рахана», - абун.
МухIаммад ХIусейн Аз-Заби абурав докторас «Ат-Тафсир вал муфасирун» абураб тIехьалда хъван буго: «Тасаввуфалъул магIна ккола рекIел шуршудиги рухIалъ бицунебги. Гьелда жаниб рацIцIалъи гьабизе бокьарасе рацIцIалъи буго тасаввуф», - абун. Хадубги хъван буго, рехсараб магIнаялъул тасаввуф исламалъул байбихьудаго букIанин абунги.
ГIабдуллагь ат-Талидица «Асбабу гьалакил умами» абураб тIехьалда хъван буго: «Тасаввуф буго исламалъул рухIги ракIги. Суфиявги ккола ихIсаналъул макъам хIакълъарав чи», - абун.
«Ас-суфият ва тасаввуф» абураб тIехьалда ГIаднан ХIакъи абурав шайихас хъван буго: «Суфизм исламалъул нух буго, гьелъул аслуги Аварагасул ﷺ хьвада-чIвади ккола. Гьебги кидаго Аллагьасе ﷻ гIибадат гьабиялда чIезарулеб хIакъаб нух буго, жибги исламалъул ракI ва рухIлъун бугеб», - абун.
