Аварагасул ﷺ квен
Аварагасул ﷺ квен
Аварагасе ﷺ бокьулеб щибаб жо нилъееги бокьизе ккола, хIатта квенцин. Аварагасе ﷺ бокьанщинаб бокьи ккола иманалъул бацIцIалъиялдасан. Анасица, Аварагас ﷺ кванан букIиналъ гуро хъабахъ кванараб. Гьес кванана Аварагасе ﷺ гьеб бокьулеб букIиналъ.
ГIатаъ ибну Ясарица бицана Умму Саламатидасан: «Дица цо нухалъ Аварагасе ﷺ бачIана бежараб чахъдал хьибил ва гьеб кванана. Хадуб как базе вахъана, какие чуричIого», - ян. (Имам Тирмизи)
Къутайбат ибну ЛагьигIатица бицана Сулайман ибну Зиядидасан ва гьесги ГIабдуллагь ибну ХIарисидасан: «Нижеца кванана Аллагьасул расуласда ﷺ цадахъ, мажгиталда жаниб, бежараб гьан».
ХIадисалъ тIоритIел гьабула мажгиталда жаниб кваназе бегьулеблъиялде, чорок гьабулеб батичIебгIан заманаялъ.
Имам Заркашияс абуна: «Мажгиталда жаниб кваназе бегьула гIеч, чед, хъарпуз ва цогидабги. Ибну Мажагьица бицараб хIадисалда буго ГIабдуллагь ибну ХIарисица абунин: «Аварагасул ﷺ заманаялъ нижеца мажгиталда жаниб чедги гьанги кванана», - ян. Кинниги рекъараб буго кванда гъоркь жо тIамизе мажгит чороклъичIого ва гьеб сабаблъун хIутI-хъумур гьениб бакIаричIого букIине. Гьеб нилъеца бицараб хаслъула махI гьечIеб кванда. Амма махI бугеб квен батани, масала, пер, ражи гIадинаб, мажгиталда кваназе карагьалъула».
Мугъира ибну ШугIбатидасан бицана: «Къасимехалъ жив, Авараггун ﷺ цадахъ, дун ун вукIана гьоболлъухъ (хъвалеб буго гьел гьоболлъухъ рукIанин Зубайр ибну ГIабдулмутIалибил яс ЗубагIатихъ). Бежараб чахъдал бох бачIуна. Нусги босун Авараг ﷺ лъугьана гьеб къотIизе ва диеги кесек къотIана. ГьебсагIаталда Билал вачIана ва абула какил заман щванилан. Аварагас ﷺ, нусги гIодоб лъун, абула гьасие щибилан. Гьесул кверал ракьул цIегийилан. Билалил михъал, кIутIбузде щун, халалъул, далун рукIана. Аварагас ﷺ гьесда абуна: «Дица къунцIила гьел сивакакги лъун яги сивакакги лъун дуцаго къунцIе», - ян.
Гьесул кверал ракьул цIегийин абиялъул магIна букIана, гьедин гьабугеян абураб. Квен цебе букIаго какда жаниб хIузур цIунизе квалквал гьабулелъул. Жеги рукъалъул бетIергьанасе бокьичIого букIине бегьула кIанцIун тIаде рахъун инеги. Аварагас ﷺ, гьединго, бежун бачIараб тIулги кванана.
