Алжан кин гIатIилъулеб?

Ибну Мубаракица «Ибриз» абураб тIехьалда хъван буго: «Дида рагIана ГIабдулгIазиз Дибагъица абулеб, аварагасде ﷺ битIараб салават къабул гьабулин абун».

Гьединго ибну Мубаракица абуна: «Щибго щаклъи гьечIо салават битIи бищун хирияб гIамал букIиналда. Алжаналъул рагIалда ругел малаикзабаз гIемер цIалула салават. Аварагасде ﷺ салават цIалиялъул баракат ккола гьенир ругел малаикзабаз цIалидал алжан гIатIилъулеб. Гьел малаикзабаз салават цIали толаро ва алжанги гIатIилъулеб букIун чIоларо. Алжан гIатIилъулеблъун чIоларо малаикзаби тасбихIалде руссинегIан. Гьелги гьелде руссунаро Аллагьас ﷻ алжаналъул агьлу жанибе битIизегIан. Алжаналъул агьлу жанибе битIун хадуб гьел малаикзаби тасбихIалде руссуна, ай гьез Аллагь ﷻ кидаго вацIцIад гьавизе вуго. Гьеб мехалъ алжаналъул гIатIилъи чIола. Гьебги буго аварагасде ﷺ салават цIалиялъул баракаталъ бугеб жо».

Щайха хас гьабун салаваталъ алжан гIатIид гьабулеб, тасбихIалъ ва цогидал азкараз гьабичIого? Гьелъие ибну Мубаракица гьадинаб жаваб кьуна: «Алжан хас гьабун салаваталъ гIатIилъула алжаналъул аслу нуралдалъун бижун букIиналъ. Алжан аварагасухъ ﷺ урхъун букIуна, вас инсухъ урхъун вукIуневго гIадин. Гьелда аварагасул ﷺ цIар рехсолеб рагIидал, гьеб бохула ва гIатIилъула. Авараг ﷺ ва гьесул уммат алжаналде лъугьиндал, гьеб бохула ва гьезие гIатIилъула», - ян. 

Имам Факигьаниясдасан имам Сахавияс бицана: «Аварагасе ﷺ салават Аллагьас ﷻ хас гьабун кьуна, цогидал аварагзабазе кьечIого. Къуръаналда ва цогидал бакIазда бихьичIо цогидал аварагзабазе гьеб кьунин абураб магIна», - ян.

Сагьлу ибн МухIаммад ибн Сулайманидасан бицана: «Аллагьас ﷻ авараг ﷺ Жинцаго ва малаикзабаз салават битIун хира гьави цIикIкIун хирияб буго малаикзабаз, Аллагьасул ﷻ амруялдалъун, Адам аварагасе сужда гьабиялдаса. Щайин абуни, Аллагьас ﷻ цин Жинцаго ва хадуб малаикзабазги битIиялъ аварагасде ﷺ салават», - ян.

Имам Сахавияс абуна: «ГIалимзабазул ижмагI буго гьаб аяталъ аварагасул ﷺ хиралъи баян гьабунин абун цогидазде дандеккун», - илан. 

Шамил МухIаммадов