Аварагасул ﷺ махсара
Аварагасул ﷺ махсара
Махсара гIемер гьаби беццараб иш гуро. Гьеб гIемер гьабиялъ инсан вачуна бичIчIунгутIиялде ва гIадамаздаги гьеб рихуна. Гьелъин Аварагасул ﷺ махсара букIараб гьоркьохъеб хIал цIунараб.
ГIемер махсараби гьарулев чи гIадамаз рикIкIунаро ва гьелъ ракIги чIунтизабула. Гьединго махсара гьабулеб мехалъ битIараб бицинеги ккола. Нилъеца халгьабуни гIемерисеб махсараялъулъ батула мекъаб, гьересияб жо. Гьединаб махсара исламалъ гьукъана.
Аварагас ﷺ махсара гьабулеб мехалъ битIараб гурони бицунароан. Аварагги ﷺ нилъее мисал босизе бищун рекъав вуго.
МухIаммад ибну Гъайланица бицана Абу Усаматидасан, гьесги Шарикидасан, гьесги ГIасим АхIвалиясдасан, гьесги Анас ибну Маликидасан, Аварагас ﷺ абунин: «Дида Аварагас ﷺ абуна кIиго гIиналъул бетIергьанилан, ай махсара гьабун, кIиго гIин бугев чийилан».
Аварагас ﷺ гьесда гьедин абуна гьев цIакъ мухIканго Аварагасухъ ﷺ гIенеккулев вукIиналъ. Гьеб махсараги гьабуна гьев веццун.
Бегьулеб махсара ккола шаригIаталъул гIурхъи бахунареб, жинца чиясе квешлъи ва зарал гьабулареб, гьесда хIунсулареб. Рес буго махсара гьабулеб мехалъ бокьулареб жо абизе. Гьебги кIочон тезе бегьуларо.
Цо-цояз абула гьесие бокьичIониги жиндие ургъел гьечIин. Амма гьеб мекъаб пикру буго. Исламалъ гьукъана чиясе бокьулареб жо абизе.
Абу Гьурайратидасан бицараб хIадисалда буго: «АсхIабзабаз Аварагасда абидал, дуца нижее махсарайищ гьабулебин абун, Аварагас ﷺ абула: «У, амма дица битIараб ва хIакъаб гурони бицунаро», - ян.
АсхIабзабаз гьеб суал кьеялъе чанго гIиллаги букIана. Цо-цоязда ккола аварагзабаз махсара гьабизего бегьулеб батиларилан абун. Гьелъ Аварагас ﷺ баян гьабуна махсара гьабизе бегьулеблъи, амма битIараб бицун.
Цогидаб хIадисалда буго диналъул вацгун къацандугеян, махсара гьабугеян ва къотIи хвезабулеб жоги кьогеян. Гьеб хIадисалъул магIна ккола кидаго гьабулеб махсара. ГIемер махсара гьабиялъ лъикIалде рачунаро.
