Мунагьалъул гiаламат

Мунагьалъул гiаламат

Салафу-салихIуназул гIадат букIана сардилъ рахъун гIибадат гьабулеб. Нилъин абуни гьеб ишалъулъ загIипго ратани, лъазе ккола гьеб гIадада бугеб жо гуреблъи. ХIасанул Басрияс абун буго: «Сардилъ тIаде рахъин чияс теларо жинхъаго ккараб цо мунагь сабаблъун гурони», - ян.

Балагьеха, чанго лъикIаб жоялъе нилъецаго нилъеего нух къалеб буго гьабураб цо мунагьалъ. Мунагь гьабиги букIуна къватIисан гуребги жанисанги, ай рекIел унтабазда хурхараб.

Ибну МасгIудица абуна: «Паразиял жал тIурайдал дуца тIадчIей гьабе сардилъ гIибадат гьабизе тIаде вахъиналда», - ян.

Гьединго абуна: «Тавраталда хъван буго: ТIадегIанав Аллагьас ﷻ хьибил сардилъ борхулезе кьуна бералда бихьичIеб, гIиналда рагIичIеб, чиясда рекIелъе ккечIеб, малаикзабаздагун аварагасдацин лъалареб жо», - ян. Имам Загьабияс гьеб хIадис кьучIаблъун чIезабуна. Салманул Фарисияс абуна: «Как ккола цIадираби. Гьеб цIалеб мехалъ рагIаракьанде щвезабуни, тIубазабуравлъун вукIуна. РагIа-ракьанде щвезабичIони, цIадирабазулъ камизабулезда гьоркьове ккола. Аллагьас ﷻ Къуръаналда абуна: «Чаракъосин буго жидеца цIадирабазулъ камизабулезе», - ян.

Аллагь ﷻ лъалел гIадамаздасан бицана: «Радакь рахъарал гIадамазул рекIеде ТIадегIанав Аллагь I валагьула ва гьебги цIезабула нуралъул, хадуб гьезул ракIазе пайда щун, гьел гвангъун рачIуна. Гьезул ракIаздасан нур чваххун уна Аллагь ﷻ кIочарал ракIазулъе», - ян.

Балагьеха, БетIергьанас ﷻ чан сабаб нилъее гIуцIун бугеб, Гьев ﷻ кIоченчIого вукIине.

Шайих Шарикица абуна: «Къаси сардилъ тIагIат гьабизе гIемер вахъунев чиясул гьумер нур бараб букIуна», - ян.

Имам АвзагIияс бицана: «Нижехъе хабар щвана къаси тIадеги вахъун гIемераб заманаялъ тIагIат гьабулесе ТIадегIанав Аллагьас ﷻ Къиямасеб къоялъ бигьалъи гьабулин», - абун.

Имам Къасим ЖугIияс абуна: «Диналъул аслу варагI ккола. ГIибадаталъулги бищун хирияблъун ккола къаси тIаде вахъун гIибадаталда сордо борчIи. Алжаналде ине бищун бигьаяб нухлъунги ккола лъикIаб ракI», - ян. Сардилъ рарал какал хириял руго къад рараздаса.

Фузайл бин ГIиязица абуна: «Къаси тIадеги вахъун тIагIат гьабизе ва кIалал кквезе бажарулеб гьечIони, мун нахъе къотIарав вуго Аллагьасул рахIматалдаса, дуца гIемер гьарун руго мунагьал», - ян. Цо нухалъ имам Гъазалиясухъе вачIуна цояв ва цIехола жинхъа къаси тIаде вахъун тIагIат гьабизе бажарулеб гьечIин абун. Имам Гъазалияс абула мун мунагьазул къоралъ ккун вугин.

Аллагьас ﷻ тавпикъ кьеги.

ШАМИЛ МУХIАММАДОВ