Лъималазул цебетIей
Лъималазул цебетIей
Великобританиялда гьарурал цIех-рехаз ритIухъ гьабуна бусурбабазда 14 гIасруялъ цебе лъалеб букIараб.
ГIелмиял цIех-рехазда рекъон, инсанасул гIакълу, цIодорлъи цIикIкIарасеб куцалда бараб букIуна инсул гуреб, эбелалъул геназда. Гьединлъидал, бихьинчиясда рекъола жиндиего цIодорай чIужу ячине. Амма тIубараб 100 проценталъ гуребха лъимадул гIакълу эбелалда бараб букIунеб. 50 процент бараб букIуна кIудияб гIолаго гьелъие щвараб тарбиялда ва сверухъ букIунеб хIалалда. Кинниги, лъимадул гIадалнахул цо-цо бутIаби камиллъиялъе эбелалдаги лъимералдаги гьоркьоб бугеб бухьен ккола, аслияб куцалда, асар гьабулеблъун. 7 сон бачIел лъималгун улбузул гьоркьоблъиялъухъ халгьабидал, лъикIаб бербалагьи щварал лъималазул гиппокамп 10 проценталъ цебетIун батун буго.
БитIахъе гIакълуялъе асар гьабулеб гьечIониги, инсул кIварги лъимадул гIумруялда жаниб сунцаго хисуларо.
Гьанжего-гьанже гIелмуялъ рагьарал гьел хIужабаз ритIухъ гьабуна бусурбабазда цебего лъалеб букIараб жо. Исламалъ кIудияб кIвар кьола руччаби, бихьиналго гIадин, лъай бугел, цIалараллъун рукIиналде.
Масала, исламалъул тIоцересел гIасрабаз руччабазе рес щун букIана щибго квалквал гьечIого гIелму цIализе, кинабго жоялъулъ церетIезе. Гьеле гьеб заман букIана халипат бищун тIегьан бачIараб, гIемерал гIелмиял цIирагьиял гьарураб, исламиял гурелги дунявиял гIелмабазулги пишачагIи рахъарал. Амма руччаби, ислам бачIиналде цебе гIадин, цIалиялдаса гьукъидал, рукъ бакIари, квен гьаби гуреб, гьелъие тIокIаб хIажат гьечIин абидал, бусурбабазул ракьазда гIелмияб цебетIей ссун ана. БакътIерхьул пачалихъалин абуни, бусурбабазул цIирагьиялги хIалтIизарун, дунялалда бищун церетIураллъун лъугьана.
Гьаб заманалда гьеб масъала дагь-дагьккун рукIалиде бачIунеб буго. Божи буго, цебего гIадин, цо заман бачIинин бусурбабазул ракьазда гIелму тIегьараб. «ЧIужугIаданалъ цояб квералъ кини, цогидалъ тIолабго дунял кIибикIула», - ян абураб кициги кIочене тезе бегьуларо.
