Гьалда лъолеб цIар щиб…?
Гьалда лъолеб цIар щиб…?
Ахирал соназда машгьурлъараб, цо-цо руччабазул унтилъун лъугьараб жо буго куц-мухъ хисизаби. Киса бачIарабали лъалареб, нилъер халкъалда рекъечIеб мода цIакъ хехго тIибитIулебги буго.
Блогеразда, артистазда хадуб халкколел диналъул яцазда ракIалде кколеб буго гьезго гIадин чорхол хиса-басиял гьаруни, жал берцинлъизе ругин абун. Жакъа гьединал операцияби гьариги расги захIматаб иш гуро.
Щиб хIажалъунха, диналъул яцал, Аллагьас ﷻ кьураб сипат хисизабизе кколеб? Щай 50 сон барал руччабазе бокьизе кколеб 20 сон барал гIолилал гIадин рукIине? БетIергьанас Къуръаналда абунги букIаго (магIна): «Дица инсан вижана бищунго берцинаб сипаталда», - ян. (Сура «Тин», 4 аят).
Аллагьас ﷻ абулеб гьечIо, Жинца ﷻ инсан 30 яги 40 сон базегIан берцинавлъун вижанин, хадуб гьев сураравлъун лъугьунин абун. Гьес ﷻ абулеб гьечIо, хъахIаб рас баккидал яги гьурмаде рукIкIалаби рехидал нуж тохтурзабахъе ва косметолагазухъе гIедегIизе кколин. Заман унеблъиги, хвел гIагарлъулеб букIинги ракIалде щвезе ахираталъе лебаллъизе ккараб бакIалда, гIолохъанлъи нахъбуссинабизе хIаракат бахъулел гIемерлъулел руго. Кинго бичIчIуларо риццатал кIутIбиги гьарун, инкубаторалъул кумекалдалъун рахъарал тIанчIи кинниги, цого сипатгун щай рукIине кколелали.
Щивасе жинда рекъараб, лъилго гьечIеб гIадаб сипат кьурав Аллагь ﷻ вацIцIадав вуго. Гьеб хисизабизе лъугьарасе гIазабги хIакъаб буго. Бичасул Аварагас ﷺ абуна: «Аллагьас нагIана кьуна черхалда жидеца сурат бахъулезе (татуировка гьабулезе) ва жидеда гьеб бахъулезе, жидеца кьунсрул ретIулезе ва жидер ретIулезе, берцинлъиялъе цаби хъухъалезе ва жидеца Аллагьас бижараб хисизабулезе», - ян (Бухари, Муслим).
Рихьизеги «гьарурал» гьурмал рокьукъал рукIуна, кигIан гьеб иш тIаса бищарал руччабазда щайтIаналъ берцин бугин ккезабуниги.
Гьединал операциял сабаблъун, щивасул чорхолъ кьижун рукIунел рак унтул клеткаби «макьидаса рорчIизе» ресги буго. ГIакъилайиланги кинха абилеб гьединай гIаданалда, гIемераб гIарацги харж гьабун, жиндиего дунялалда унтабиги, ахираталда гIазабги бичун босулеб мехалда.
Унго-унгояб гьайбатлъи ккола берцинаб тIабигIат-гIамалги иманалъул цIураб ракIги. Бугелда разилъиги хIакъикъияб берцинлъиги кьеги нилъее БетIергьанас!
