Алжаналда чӀужу лъида цадахъ йикӀуней?
Абулеб рагIана кIицIул яги цIикIкIун рукъалде ун йикIарай чӀужугӀадан Алжаналда йикIунин тӀоцевесев росгун цадахъ. Бокьилаан гьелъул мухIканлъи лъазе.
Щивав чи вукӀуна гьаб ракьалда жиндиего вокьулев чигун цадахъ. Амма бищун лъикӀаб гӀамал-хасият букӀарав росасда аскӀой чӀужу Алжаналда йикӀине йигин абураб пикру буго гIалимзабазул. Аварагасул ﷺ чӀужу Умму ХӀабибаца цо нухалда Аварагасда ﷺ гьикъун буго: «ЧӀужугӀадан кIицIул росасе ун ятани, Алжаналда гьей лъида цадахъ йикӀуней?» - абун. Аварагас ﷺ жаваб кьун буго: «Гьей йикӀине йиго бищунго лъикӀаб гӀамал-хасият букӀарасда аскӀой, бищунго лъикӀаб гӀамал-хасият гьаб дунялалдаги доб дунялалдаги бищун лъикӀаб бугелъул», - ян.
Гьединго, чӀужугӀаданалъ жинцаго тӀаса бищизе бугин кинасда цадахъ йикӀине бокьилебали абураб пикруги буго.
МугӀавияе, Абу ад-Дарда хведал, бокьун букӀана Умму ад-Дарда ячине. Гьелъ абуна: «ХӀакъикъаталдаги дида рагӀана Абу ад-Дардаца абулеб, Аллагьасул Расулас абун букӀанин: «Рос хварай ва гьесдаса хадуй росасе арай чӀужугӀадан ахирисев росгун йикӀине йиго», - ян.
Чанго чиясе росасе ун йикӀарай гӀадан йикӀине йиго ахирисев яги тӀоцевесев росасда цадахъ. Гьелъие тӀаса вищизе ихтияр кьезе бугинги буго ва гьелъги тӀаса вищизе вугила гӀамал-хасият лъикӀав рос. ТӀадегӀанав Аллагьасда божарай, амма росасе ун йикӀинчIей гӀадан Алжаналде лъугьина ва Аллагьас жиндие тӀаса вищарав чиясул чӀужулъун йикӀина. Гьединго, квешав, иман гьечIев чиясул лъадилъун йикIаралъеги БетIергьанас Алжаналда лъикIав рос кьела, фиргIавнил чIужу Асиятие МухIаммад авараг ﷺ кьурав гIадин.
