Иманалъул нур

Иманалъул нур

Инсанасе жакъа дунялалдаги, метер ахираталдаги талихI букIиналъе бищун чара гьечIого хIажалъулел дару-сабабазул цояб ккола жинца лъикIаб рахъалде пикру хIалтIизаби ва гьелдаса пайда боси.

Пикру гьабеян абулелъул магIна ккола, ТIадегIанав Аллагьасул ﷻ хIалкIолъиялъулги тIадегIанлъиялъулги, Гьес ﷻ гIажаибго бижун бугеб зоб-ракьалъулги, махлукъаталъулги пикру гьаби. Гьелъул аслияб мурадги ккола пикруялдалъун гIелмуги цIикIкIинабун, БетIергьанасдеги ﷻ щун, илагьияб нуралъ ракI гвангъизаби. Гьединлъидал инсанас хIаракат бахъизе ккола хIалкIун гьеб лъикIаб рахъалде буссинабизе.

Гьеб пикру гьабиялде кIвар кьун ахIулел хирияб Къуръаналъул аяталги аварагасул ﷺ хIадисалги гIемер руго. Гьениб рехсон буго гьаб магIнаялда бугеб аятги: «Зоб-ракь берцин гьабун бижиялъулъги, сордо-къо хисизабиялъулъги гIакълу бугел, цIодорал чагIазе пикру гьабизе гIурал хIикмалъаби руго», - абун. Хадусеб аяталда мухIканго баян гьарун руго гIакълудал бетIергьаби щал кколелалиги: «Гьединал цIодорал, гIакълуял гIадамал ккола жидеца регун, рахъун, гIодорчIун рукIаго Аллагьги ﷻ рехсолел ва зоб-ракь бижиялъулги гьезул хIикматазулги пикруги гьабун жидецаги абулел: - Я, БетIергьан Аллагь, Дуца гьаб кинабго гIадада бижичIо (хIакъалдалъун гурони), нижеца Мун Дуе данде кколарел, киналго сипатаздаса вацIцIадги гьавула ва Мун разияб гIамалги кьун, битIараб нухдеги тIоритIун, дуца ниж цIадул гIазабалдаса цIуне», - ян.

Аварагас ﷺ абун буго: «ТIадегIанав Аллагьас ﷻ бижараб махлукъаталъул пикруялда цо сагIаталъ вукIин, цо соналъ гьабураб гIибадаталдасаги хирияб буго», - ян.

Аллагьас ﷻ нилъ гьареги пайдаяб жоялъулъ пикру гьабулелъун.

МухтарахIмад МухIаммадов