ЦIакъ рокьула амма...
ЦIакъ рокьула амма...
Хириял лъимал, эбел-инсудехун цIунизе кколел адабал гIемер руго. Аварагас ﷺ гьелъул хIакъалъулъ гIемерал хIадисалги рехсон руго. «Эбел-эмен разилъиялъ гIумру халат гьабула» ва «Нужее алжан эбел-инсул хIатIазда гъоркь буго», - абурал хIадисал.
Лъимал, нужее киназего эбел-эмен цIакъ хириял ратила. Дун вуго 57 соналъ лъималазе тарбия ва лъай кьолаго гIумру арав чи, гьелъ бокьун буго гьездехун букIине кколеб адабалъул бицине.
– Эбел-инсул каламалъухъ гIодоре риччан гIинтIаме, адаб тун данде кIалъаге.
– Эбел-эмен тIаде рачIиндал тIаде вахъа ва гьезие гъоркь лъезе бакI босе.
– Гьезул амру тIубазабе, цохIо Аллагьасде гIасилъи хутIизегIан.
– Гьездехун мугъги кьун чIоге.
– Гьезда кIалъалеб мехалда гьаракь борхизабуге.
– Гьезул ахIиялъе берцинго гьабе жаваб.
– Щиб гьабулеб бугониги гьезул разилъи тIалаб гьабе.
– Гьездехун руссунеб мехалъ адабалда, гурхIел-рахIмуялдалъун ралагье, хасго херлъараб мехалъ, гьабулеб хъулухъги берцинго гьабе.
– БадирчIваял гьарун гьезул ракI бекизабуге.
– Ццим бахъун киданиги гьезул бадире ралагьуге.
– Гьезда бичIчIизабизе къваригIараб, гьумер букIкIинабун кIалъаге, хIеренаб каламалдалъун гьабе.
– Сапаралъ рахъунелъулги гьезул изну тIалаб гьабизе хIаракат бахъе.
Дир хириял лъимал-гьитIичIал, Аллагьас къуват кьеги нужее кидаго эбел-инсул адаб цIунулеллъун рукIине.
