Аварагасде ﷺ гIагар гьарулеб гIамал
Аварагасде ﷺ гIагар гьарулеб гIамал
Къуръаналда Аллагьас ﷻ абулеб буго хирияв Аварагасе ﷺ рецц гьабун ва гьесул берцинаб тIабигIаталъул бицун: «Мун, хирияв ХIабиб, цIакъ берцинаб тIабигIаталъул чи вуго», - ян.
Аварагасда ﷺ цIеханила щибжо кколеб тIабигIат берцинлъиян. Аварагас ﷺ жаваб кьун буго: «Гьеб буго дургун гьоркьоблъи къотIизабуравгун гьоркьоблъи кквей, мун махIрум гьавурасе дуца жо кьей, дуда зулму гьабурасда тIаса лъугьин». Абу-Давудица бицун буго Аварагас ﷺ абунин: «Бищун къиямасеб къоялъ цIадирабазе бакIаб, лъикIаб гIамалал ккола Аллагьасдаса хIинкъи ва тIабигIат берцинлъи».
Абу-Дардаица бицараб хIадисалда буго: «ЦIадирабазда бищун бакIаб лъикIаб гIамал буго тIабигIат берцинлъи», - ян.
ТIабараниясдасан бицараб хIадисалда буго: «Нужеда хIал кIоларо боцIиялдалъун гIадамазе гIатIилъи гьабизе, нужеца гьумер битIиялдалъун ва берцинаб тIабигIаталдалъун гьабе гIатIилъи».
Исламалъул байбихьуда жидерго лагълъиялда ругел бусурбанлъарал гIадамазе, лъималазе ва гIагарлъиялъе кIудияб гIакъуба гьабулеб букIана къурайшияз. Гьезул гIакъуба кигIан кьогIаб букIаниги, санагIат ккарабго, Аварагасухъе ﷺ рачIунаан гьел. Жидеда лъалеб букIаниги гьелдалъун жеги кутакаб гIакъуба щвезе рес букIин. Нилъер хириясулъ ﷺ букIинчIо гьезие кьезе боцIи яги гьезие гьабулеб хассаб кумек. Гьесул гIажаибаб берцинаб тIабигIаталъ ва хьвадиялъ рукIана гьел Аварагасухъе ﷺ цIалел.
Къуръаналда Аллагьас ﷻ абулеб буго Аварагасде ﷺ хитIаб гьабун: «Мун вукIаравани хъачIав ракI биццатав, гьел асхIабзаби дуда аскIоса лъутун инаан», - ин (сура «Алу ГIимран» 159 аят).
Аварагас ﷺ абулеб буго: «Диде бищунго гIагарав нужер берцинаб тIабигIат бугев вуго», - ян. Аллагьас ﷻ гьареги нилъ гIамал-тIабигIат берциназдаса! Амин!
