БукIине ккола божилъи
БукIине ккола божилъи
Дагъистаналда руччабаздехун кидаго букIана лъикIаб бербалагьи. Гьел цIунулаан, кIодо гьарулаан. Гьедин гьабейилан исламияб диналъги малъула.
Тарихалдасанги нилъеда лъала ватIан цIунизелъун гьел, борчун ярагъгун, къватIире рахъиналъул мисалал. Амма гьанжесеб гIелалда гьоркьор камулел гьечIо сурукъал ишал гьарулел ясал. ХIатта хIужаби руго гьел цоцалъ рагъиялъул, цоцазда рогьрал раялъул. Гьединал ишалги гьарулел руго рокъоб эбел-инсул тарбия щвечIез. Эбел-инсуца гьезда бихьизабулеб гьечIо берцинаб мисал, гьарулел гьечIо малъа-хъваял, цадахъ тIамулеб гьечIо заман. Гьединаб мехалда лъималги ругьунлъулел руго къватIазде.
Лъималазул гIадлу хвеялъе квербакъи гьабула телефоназги, гьезда жанир ругел хIаязги, гьез гIинтIамулел кучIдузги. Лъималазулъ пикру бессизабулеб буго хъачагълъи, цогидазда зулму гьаби цIакъаб жо гIадинан.
ГIемерисел эбел-эмен лъималазе тарбия кьеялдеги регIун гьечIо. Чед-хинкI балагьиялъул мурадалда гьел хIалтIулел руго чанго бакIазда ва лъималги хутIулел руго жалго жидедего руссун.
ХIакъикъаталдайин абуни букIине ккола гIадлуги, низамги, лъималазда тIад лъурал тIалабалги. БукIине ккола улбуздаги лъималаздаги гьоркьоб божилъи, хIаракат бахъизе ккола цадахъ заман тIамизе. Материалияб рахъалъул гуребги ургъел гьабизе кколелъулха рухIияб рахъалъулги.
Гьайгьай гIайиб камурав чи вукIунаро. Хасго гIакълу цIубазегIан гьитIинал чагIазул ккола гIемерал гъалатIал. Амма гьел ритIизаризе рес кьун буго БетIергьанас. Дагьаб лъалхъи гьабун балагьани, бичIчIула щивасда ккараб гъалатI ва хIаракат бахъила гьеб битIизабизе.
