ГIакълабазул гъамас
Къойида жаниб цониги лъикIаб рагIи рагIани, цониги лъикIаб гIамал бихьани ва жинцаго цониги лъикIаб иш гьабуни, абизе бегьула гьев чиясул къо гIадада инчIилан.
***
Хъулухъалда вукIаго ракIалда чIезабе кIиго хIакъикъат: «РитIухълъиялъулъ загьирлъула гIакъиллъи. ХъантIи гьечIолъиялъ борхизабула къадру». Рокъове тIадвуссиндалги ракIалда чIезабе кIиго хIакъикъат: «Рази-ракиго вукIиналъулъ батула рахIат. ЦIуна-къаялъ гьарза гьабула боголъи».
***
Эбел-эмен лъималаздаса къадруял рукIуна. Амма жидехъ гIенеккуларел лъималазда цебе гьезулги чилъи хола.
***
Гьудуласухъе индал гьесул лъималаз бицуна дуда мун гьесие хIажат вугищ яги гьечIищали. Лъимал данде рортун рачIани, гьудулас дур хIурмат гьабулеб буго. РачIинчIони, гьудуласе мун вихьизецин бокьун гьечIо.
***
БугьтанчагIи релълъуна бакъалда цебе бачIараб накIкIуда: гьезда гIемераб мехалъ бахчизабизе кIоларо лъикIлъи. ХIелхIелчагIи релълъуна тIеренабго гьорол хIухьлада: гьел аскIоса тIагIараблъиго лъаларо.
***
Инсанасулъ цогIаги ярагьунеб пикру гьечIони, гьев релълъун вукIуна кидаго гIебеде кверги битIун вукIунев гьардухъанасда. Инсанасул цогIаги бокьулеб иш гьечIони, гьев релълъун вукIуна цо бакIалда эхетараб цIулал хIохьода.
***
Цо кинаб бугониги иш гьабулеб гьечIони, гIакълу тIехIуна. РахIаталдасацин пайда босизе ккола гIакълудал канлъухъе щвезе. Ишалде машгъуллъарал сагIтазги гIакълу тохлъула. ГIакълудал канлъудасаги пайда босизе ккола рахIат щвеялъе.
***
Дурго ракIалде рагIад рехизабуге. Цогидазул рекIел хIалги цебе рехун бихьизабуге. Буголъиялъул къуват лъугIизабуге. Гьаб лъабабго къагIида цIунани, дунялдаги ахираталдаги цадахъ гIумру гьабизе, гIадамазе рахIат, наслуялъе талихI кьезе рес щола.
***
Абу-Дардаица бицун буго, Аллагьасул расулас ﷺ абулеб рагIанин: «Къиямасеб къоялъ тIоцебе цIадирабазда лъолезул берцинал ахлакъалги сахаватлъиги буго. Аллагьас иман бижараб мехалда, иманалъ абуна: «Я, дир Аллагь, Дуца дун къуват гьабе», - ян. Аллагьас гьеб лъикIал ахлакъаздалъун ва сахаватлъиялдалъун къуватаблъун гьабуна. Капурлъи бижидал, гьелъ абуна: «Я, БетIергьан, къуватаблъун гьабе», - ян. Цинги Аллагьас гьеб бахиллъиялдалъун ва квешал ахлакъаздалъун къуват гьабуна».
***
ХIалтIичIого бетIербахъи гьабизе бокьиялъ гьерсихъанлъун ва цIогьорлъун лъугьинавула.
***
Воре, зинаялдаса рикIкIад чIа. Гьеб байбихьула пахрулъиялдаса ва чохьое бокьа-бокьараб гьабиялдаса, амма лъугIула язихълъиялде ккеялдалъун.
***
ЛъикIаб квен бугони - гьалбал гIемерлъула, гIемераб бечелъи бугони – гьудулзаби цIикIкIуна. Амма мун гIодов ккараб къоялъ гьел дуда ратуларо.
***
рукIуна ихдалил баракатаб гьорода. ХIеренго гьеб пуйдал, тIабигIат чIаголъула. Квешал пикраби релълъун рукIуна цIорораб савуял-да. Гьеб тIаде ккедал чIагоябщинаб хола.
