РетIел кин ва кинаб ретIилеб?
РетIел ретIулаго ният букIина гIаврат бахчизе, Аллагьасул амру тIубазе, бухIи-цIороялдаса черх цIунизеян. ГIадамазда, хасго руччабазда берцин вихьизеян абун ретIел ретIиларо.
Руччабазги, бихьинал ругеб бакIалда, черхалъул щибго бакI цебе лъолеб, тIомол кьер бихьулеб, лагаялъул куц лъалеб ретIел тIад ретIиларо. ГIадамазда берцин вихьизе гIоло ретIел ретIи рияъ ккола. Рияъ гьитIинаб ширк кколин абураб хIадисги буго. ГIалимчиясе, халкъалда цеве вахъунев чиясе, ният лъикIаб бугони, лъикIаб ретIел ретIизе хирияб буго. РетIелги заманалда, бакIалда рекъараб ретIила, гIадамаздаса живго ватIа вахъулеб, гIадамазул пикру тIаде цIалеб, машгьурлъизавулеб партал ретIиларо. Гьоркьохъеб хIалалъул ретIел ретIила.
РетIел букIа, хьитал рукIа, ретIунеб мехалъ, кваранаб рахъалдасан байбихьила, тIаса бахъулаго, квегIаб бахъила. Хасго руччабаз цIуни гьабила капурзабазул модаби гьариялдаса, цо-цо гIадамазда релълъенлъи гьабурав чи гьездасан вукIунилан хIадисги буго.
Черх ва черхалъул сурат цебе лъолеб ретIел ретIулел руччабазда алжаналъул махI чIваларин абураб магIнаялда бачIараб кьучIаб хIадисги буго. ХъахIаб кьералъул ретIел ретIизеги хирияб буго. РетIилалде цебе ретIел кIобокIизеги рекъараб буго.
РетIелги «Бисмиллагьги» бахъун ретIила, ретIун хадуб гьаб дугIаги цIалила: «АлхIамдулиллагьи ллази касани гьаза ссавба ва разакъанигьи мин гъайри хIавлин минни вала къувватин. Аллагьумма инни асъалука мин хайригьи ва хайри ма сунигIа лагьу ва агIузу бика мин шарригьи ва шарри ма сунигIа лагьу». РетIел бахъулеб мехалъ, гьаб дугIа цIалила: «Бисмиллагьи ллази ла илагьа иллагьу», - абураб.
